Repsol YPF

O chan radiante é un sistema de calefacción invisible, instalado nunha superficie baixo o pavimento mediante unha rede de condutos, e adaptable a todo tipo de enerxías convencionais (gasóleo, gas e electricidade) e alternativas (enerxía solar, recuperadores de chemineas, calor residual de procesos industriais, augas termais, etc.). A calor introdúcese no chan e progresivamente chega á vivenda ata lograr unha temperatura ambiente duns 20º C. Actualmente a modalidade máis estendida é a instalación no solado de tubos de polietileno reticulado, colocados a uns cinco cm por debaixo da superficie, cunha distancia de separación entre eles de entre 10 e 30 cm A auga que circula polos condutos, que se quenta na caldeira, ten unha temperatura duns 45º C, coa que o pavimento acada uns 25º C, e o ambiente uns 20ºC, temperatura idónea para unha vivenda. 
A distribución da calor realízase de forma homoxénea, de maneira que o ser humano recibe un confort térmico maior que cos sistemas tradicionais, pois non se xera po queimado nin se reseca o ambiente da estancia. O feito de non precisar radiadores é un aspecto moi beneficioso para o usuario, que gañará en estética, en espazo dispoñible e en seguridade para os residentes, xa que se evitarán os golpes e rozaduras cos mesmos. Precisamente, o solo radiante é moi recomendable se hai nenos e persoas maiores no fogar, pois ademais de recibir a calor da forma máis sa e natural posible, non correrán o risco de se queimar cos radiadores. 
As actuais ofertas das compañías de gas e de electricidade reducen bastante os custos do gasto enerxético e das instalacións. As tarifas nocturnas das eléctricas e os plans personalizados dalgúns subministradores de gas logran interesantes rebaixas nos consumos. O gas é a mellor solución para as vivendas de tamaño medio. 

Usos e limitacións
O solo radiante é o sistema de calefacción perfecto para as novas vivendas, xa que require unha obra de envergadura, pois debe colocarse a rede de condutos baixo o pavimento. Pódese acometer unha reforma nos fogares habitados, pero esta é bastante laboriosa ao ter que levantar o chan. Un inconveniente que se lle adxudica a esta modalidade de calefacción é o custo, que pode estar entre os 5.000 e os 7.000 euros nunha casa duns 100 metros. Se se trata dunha reforma, a esta cantidade habería que lle sumar o gasto en albanelería para colocar o pavimento novamente. 
Porén, o prezo da instalación non é unha desvantaxe se se calculan as porcentaxes de aforro posteriores nas facturas de consumo enerxético e no mantemento da infraestrutura, practicamente nulo. Si convén revisar a caldeira anualmente, como ocorre cos sistemas de calefacción convencionais, pero este é un labor que pode realizar o usuario cunhas mínimas nocións acerca de dous ou tres parámetros concretos, que o propio instalador pode lle explicar no momento de acometer o proxecto. A seguridade que ofrece o chan radiante, a garantía e o funcionamento perfecto do mesmo por un tempo de mínimo de dez anos, o grao de confort que proporciona e o illamento adicional achegado, compensan claramente o investimento inicial na instalación. 
Pese ás súas vantaxes, o chan radiante ten tamén algunhas limitacións ligadas á elección do pavimento no fogar e á disposición e distribución do mobiliario. Non é aconsellable instalalo con chans de madeira porque o coeficiente de transmisión de calor deste material non é moi elevado e pódese perder enerxía. Sería máis produtivo, neste caso, introducir os condutos radiais nas paredes. O coeficiente de transmisión de calor da cortiza é inferior ao da madeira, polo que é incompatible co chan radiante, que encontra na cerámica o material máis idóneo para unha correcta distribución da calor. 
Con respecto á disposición dos mobles, estes débense colocar tendo en conta a instalación, de forma que algúns non se sitúen xusto encima do elemento calefactor. Este aspecto resta liberdade no ámbito decorativo, pero cun estudo completo do espazo, poderanse resolver todos os inconvenientes. O consumidor debe consultar estas e outras cuestións ao instalador antes de iniciar as obras.

Artigos relacionados:
- Quentar a casa
- Vestir os chans