Repsol YPF

 Ferramentas e materiais
Chaves inglesas ou de grifa. Chaves Allen do grosor apropiado, fío de cánabo ou teflón. Unha chave de paso e regulación nova. Pode ser con termóstato incorporado. Baeta e un pequeno caldeiro por se hai que recoller auga.
 
Elementos do radiador
Polo xeral, un radiador ten tres partes de regulación da auga quente. Por unha canalización superior entra a auga. Esta adáptase ao aparello cunha chave de peche e dúas roscas, que se instalan nun dos dous orificios superiores dos que dispón o calefactor. O lado onde se pon a chave elíxese segundo cada parede ou casa aínda que adoita estar á dereita.
Na parte de abaixo, o radiador dispón doutros dous orificios, preparados cos seus correspondentes mecanismos de peche (normalmente cun peche de cabeza allen, e as súas roscas) para poñer a canalización de saída da auga.
O orificio de saída escóllese de acordo co que se dispuxera de entrada: se a chave se puxo á dereita, a saída debe estar no orificio inferior esquerdo. En cambio, se a chave se puxo á esquerda, debe utilizarse o da parte de abaixo do lado contrario. O que non se usa queda condenado cunha tapa enroscada especial.
Un terceiro elemento é o mecanismo purgador, que xa adoita ser de purgación automática.
 
Desmontar a chave antiga
Por precaución interésalle baleirar a auga do circuíto da calefacción. Baleire o sistema pola chave de desaugadoiro que haberá instalada nalgún dos radiadores, o que se colocara na posición máis baixa. Quizais no cuarto de baño. Se non existise, pode baleirar a auga por calquera radiador, tendo a precaución de poñer un recipiente debaixo.
Con dúas chaves inglesas ou chaves de grifa afrouxe as roscas que suxeitan a chave de paso de forma cónica.
Teña precaución de suxeitar unha das roscas cunha chave mentres afrouxa a outra.
As roscas quedarán cada unha no seu correspondente tubo, un sae do radiador e o outro sae da parede.
 
Colocar a nova
Poña cinta de teflón nas terminacións de rosca da nova chave de paso. Non é imprescindíbel, pero é unha pequena axuda para conseguir unha mellor estanquidade.
Coloque na súa posición a nova chave e enrosque cos dedos as dúas roscas á chave.
Finalmente, aperte cada rosca, pero suxeitando a outra con outra chave, para evitar roturas.
Encha o circuíto se o baleirou abrindo a chave de enchedura da caldeira, e comprobe que o radiador non gotea e quenta correctamente.