Repsol YPF

A onagra (Oenothera Biennis) tamén coñecida como prímula ou herba do asno é unha planta bianual silvestre, orixinaria de América do Norte. Os europeos comezaron a importala no século XVII, ao comprobar como os nativos a empregaban para curar feridas e tratar trastornos asmáticos. 

O aceite obtense pola presión en frío das súas sementes. Nelas atópase a singularidade que rodea este produto, porque son ricas en ácidos graxos poliinsaturados de gran valor. En concreto conteñen un 10% de ácido gammalinoleico (que os demais aceites vexetais non posúen) e ata un 70% de ácido linoleico, ambos ácidos graxos esenciais da serie Omega 6. Esta familia dos ácidos graxos fórmase a partir do ácido linoleico.

Prostaglandinas, reguladores vitais

Os ácidos graxos esenciais son necesarios para o axeitado  funcionamento das células pero o propio organismo non os pode elaborar, polo que se fornecen coa alimentación.  Xogan un papel bioquímico fundamental porque son compoñentes vitais da estrutura de todas as membranas do corpo e, en segundo lugar, porque son os precursores necesarios das prostaglandinas. 

As prostaglandinas son compostos bioloxicamente moi activos que se atopan en case todos os tipos de células. Trátase de reguladores vitais, que contribúen ao mantemento das funcións dos diferentes órganos corporais. Coñécense arredor de 15 tipos diferentes de prostaglandinas. As PGE1 fórmanse a partir do ácido gammalinolénico que contén o aceite de onagra (ou a partir do seu precursor, o ácido linoleico) e interveñen nos procesos de dolor, inflamación e febre. Entre outros, contribúen a que a insulina sexa máis eficaz e tamén desenvolven un papel fundamental no proceso da hemostase, á hora de deter as hemorraxias. 

Existen estudos que demostran o efecto beneficioso do ácido linoleico en canto ao colesterol en sangue. O seu consumo axuda a previr os riscos de infarto ou de arterioesclerose e tamén contribúe a diminuír a hipertensión arterial. Neste último caso, a musculatura vascular reláxase e amortécese o efecto das hormonas que inducen un aumento da presión. 

Impide que se formen coágulos, co que aumenta o nivel de fluidez do sangue, ten unha acción vasodilatadora e mantén a elasticidade dos glóbulos vermellos. De feito, ningún outro ácido graxo insaturado reduce tanto o LDL ou colesterol malo. 

O aceite de onagra conta cunha serie de propiedades terapéuticas, moi efectivas á hora de tratar enfermidades do sistema inmunolóxico como a rinite alérxica, a dermatite atópica ou a asma. Por outra parte, resulta de axuda á hora de protexer o estómago, porque reduce a secreción de ácidos gástricos e, ao frear os procesos inflamatorios, impide o avance de enfermidades dexenerativas como a artrite ou a artrose. No caso da esclerose múltiple, actúa estimulando os linfocitos T (células do sistema de defensas do organismo), detén o agregado de plaquetas para impedir a formación de coágulos e reforza os vasos sanguíneos, ademais de regular e normalizar as conducións nerviosas. 

Alivio na menopausa

Este aceite de onagra ten unha especial demanda entre a poboación feminina. O contido en fitoestróxenos das prostaglandinas axuda a aliviar os síntomas da menopausa (sufocacións ou calores, sequidade nas mucosas, etc.) e favorece a elasticidade da pel, hidratando de dentro cara a fóra. Estas prostaglandinas tamén están indicadas no caso de padecer problemas na pel ou o pelo, como alopecia, caspa, caída do cabelo ou unllas quebradizas. 

Ademais, as prostaglandinas contan cun poder antiinflamatorio que contribúe a mitigar as dores de cabeza e a inchazón que sofren moitas mulleres co síndrome premenstrual. O aceite de onagra pódese atopar en establecementos de dietética, en forma de cápsulas que conteñen o aceite xunto cun pouco de vitamina E, para evitar a súa oxidación. 

Artigos relacionados:

- Os beneficios medicinais do noni

- Alimentos que protexen fronte ao cancro