Repsol YPF

A oferta de restaurantes doutros países nas nosas cidades é unha alternativa tentadora para saír a cear fóra da casa e aínda que esteas a dieta non tes por que permanecer na casa e privarte de gozar dunha boa velada. 
 
O problema pode xurdir á hora de elixir, cando se descoñecen os ingredientes e a forma de cociñar as receitas típicas. Entre os restaurantes europeos non hai problemas para atopar pratos baixos en calorías, pero tamén hai outros ben coñecidos que convén evitar. 

Nos restaurantes franceses convén que teñas coidado coas típicas fondues de queixo, o pan con manteiga antes das comidas ou os brioches, ademais do clásico paté. A cociña alemá, pola súa parte, é abundante, de sabores contundentes e gran consistencia, por iso debes elixir con coidado entre os seus pratos porque moitos implican unha achega calórica bastante alta. Ademais, acostuman estar acompañadas de salsas como a tártara e patacas fritas. As súas sobremesas, por outro lado, son unha auténtica tentación, en especial as tortas. 

A cociña grega é similar á española. Emprega o aceite de oliva e podes atopar pratos baixos en calorías, xunto a outros tentadores como os queixos en aceite ou a backlava, un pastel “perigosamente” confeccionado cunha pasta de noces triturada, distribuída en varias láminas de follado e bañado en xarope de azucre ou de mel. A musaka é unha das receitas máis populares e saborosas desta cociña pero supón unha alta achega calórica, así que é mellor que te decantes polas súas ensaladas e peixes frescos. Se o elixido é un restaurante italiano, a pasta é unha auténtica tentación nas súas múltiples presentacións e o mesmo se pode dicir dos seus xeados. 

Deliciosos bocados asiáticos

Desde hai décadas, os restaurantes asiáticos, especialmente os chineses, convertéronse noutra alternativa recorrente á hora de elixir, dado o gran número de establecementos que se atopan nas nosas rúas. Á hora de elixir, podes escoller pratos preparados á cantonesa, que se elaboran con ingredientes cocidos ao vapor ou salteados a lume vivo.

Se vas cear nun restaurante xaponés, unha boa opción son pratos como o sushi ou o sashimi. Ambos teñen como ingrediente común o peixe cru. O primeiro, cortado fino, mesturado con arroz e enrolado en alga nori e o segundo, fileteado e acompañado de salsa de soia, daikon (unha especie de rabo de sabor suave), algas, láminas de xenxibre ou tofu. O sushi hai que comelo acabado de preparar, para apreciar a diferenza de temperaturas entre o peixe e o arroz. Porén, convén que evites a tempura (o rebozado de verduras e peixes) e o tako-yaki (pasta frita acompañada de polbo). 

Dentro da preocupación por unha alimentación saudable, a cociña tailandesa encaixa perfectamente, porque a súa gastronomía presenta baixos niveis de colesterol e poucas graxas. Nos seus pratos abundan as verduras exquisitas, xeralmente cocidas. O wok é perfecto para cociñar receitas baixas en graxas e tamén podes optar polos pratos asados, tanto de carne como de peixe, iso si, prescindindo das salsas. Algúns dos seus pratos típicos son o Pad Thai (fideos de arroz), o Ped Dang (polo asado ao xenxibre) ou o Khao Mangal (polo con arroz fervido).

Ampla oferta vexetariana

Se acodes a un restaurante indio, terás unha variada oferta onde elixir, xa que a súa gastronomía se caracteriza por multitude de pratos vexetarianos. Ademais, é una forma diferente de comer, xa que nunha mesma fonte se serve un conxunto de pratos: o prato principal acostúmase acompañar de exquisitos arroces, ensaladas con especias, chutneys (unha preparación agridoce de froitas e verduras) e raitas (iogur con froitas e verduras). Porén, convén que evites o paneer ou queixo frito. 

Na cociña árabe, a crema de garavanzos ou hummus é ideal como aperitivo. De textura suave, acostúmase servir untada en pequenos anacos de pan torrado, endivias, paos de cenoria ou tronquiños de apio e ten a vantaxe de ser baixa en colesterol e moi saborosa. Para un menú baixo en calorías, podes elixir unha ensalada fría como o tabbouleh, feita con cuscús, tomate e menta. Tamén podes pedir un prato único cun cus-cús de polo e verduras. Polo contrario, é mellor que evites comer pan de pita untado en cremas, os falafel (unha especie de croquetas de legumes, moi saborosos pero con bastantes calorías) ou as súas sobremesas típicas como a maskina, elaborada con azucre, aceite e froitos secos. 

Artigos relacionados

- Aires de oriente na mesa

- Casual food, comida rápida e saudable