Repsol YPF

En plena etapa primaveral, en moitos fogares preséntase a alternativa de establecer unha dieta estrita para pórse en forma de cara á época estival. Con frecuencia hai quen se autoimpón un réxime espartano, no que quedan fóra moitos alimentos necesarios para o organismo. 

Non é necesario chegar a este punto, xa que o segredo está en comer de forma moderada e seguir unha alimentación equilibrada que siga os principios da Pirámide alimenticia. De todas as calorías que se inxiren, entre un 50% e un 60% deben ir en forma de hidratos de carbono (legumes, verdura e pasta), un 30% en forma de graxas e un 20% aproximadamente en forma de proteínas (carne, peixes e lácteos), sen esquecer a froita fresca. 

Se estás decidido a rebaixar calorías podes seguir algúns consellos á hora de confeccionar os menús. A graxa dos alimentos é un dos principais cabalos de batalla. Cando estes se friten ou se rebozan poden duplicar facilmente o seu número de calorías. Convén decantarse por técnicas culinarias como á prancha, ao forno ou ao vapor, que permiten cociñar con pouca cantidade de aceite. Outra alternativa é empregar un pulverizador para este aliño, de forma que se regan os alimentos sen excederse na cantidade. 

Gornicións… si ou non ?

As gornicións acostuman ser un dos elementos que primeiro desaparecen cando se establece unha dieta hipocalórica. Porén, non é necesario suprimilas de golpe. Unhas patacas fritas pódense substituír por unhas aromáticas verduras á prancha como acompañamento, unha ensalada ou tomate aliñado. Outro tanto podes facer cando preparas cocido: substituír os embutidos por diferentes combinacións de verduras, que achegarán o seu punto saboroso e axudarán a reducir calorías. 

Algo semellante sucede coas salsas, un acompañante imprescindible en moitos pratos, pero que pode ser unha bomba de calorías. Algunhas como a tártara ou a bearnesa teñen unha base de aceite e a mesma maionesa normal achega unhas 100 calorías por cullerada mentres que a maionesa light só a metade. 

Nos aliños de ensalada podes reducir tamén as calorías á metade se os preparas a base de limón ou vinagre ou ben cunha base de iogur light mesturada con outros ingredientes ao gusto. Un truco para as salsas é aderezalas con picante, porque ao rebaixar a graxa tenden a quedar sosas e desta maneira incrementan o seu sabor. 

En liña fóra da casa

Hoxe en día, os horarios de traballo obrigan a miles de persoas a comer fóra da casa e nesta rutina tamén convén seguir unhas pautas que axuden a manter unha dieta equilibrada. Á hora de elixir, é preferible deixar a un lado as frituras e procurar que os primeiros pratos sexan ensaladas, legumes ou verduras. Os segundos poden ser tanto carne como peixe pero asados, á grella, ao vapor ou cocidos, nin fritos nin rebozados e para rematar un iogur desnatado, unha infusión ou unha peza de froita fresca como sobremesa, elixindo entre as menos calóricas como as fresas, o melocotón, a mazá, o kiwi, o melón ou a sandía. 

Se queres facer unha comida lixeira sempre podes pedir un primeiro prato como comida principal e se a túa comida consiste nun bocadillo salgado ou un emparedado, convén que elixas carne que non teña graxa como polo, xamón ou friame de pavo con pan integral. Convén evitar os refrescos e as bebidas gasosas. 

Artigos relacionados

- Comer san fóra da casa

- Novas etiquetas para os produtos light