Repsol YPF

Entre as moitas alternativas saudables para o organismo, os zumes naturais e de elaboración caseira son unha fonte de vitaminas e minerais, necesarios para manterse san. A súa vantaxe, fronte aos envasados (ben sexan concentrados ou non) que se poden adquirir nos establecementos comerciais, é que son autenticamente frescos e non conteñen aditivos nin conservantes. 

Por unha parte, son ricos en vitamina C, especialmente os preparados con cítricos (un zume de laranxa acabado de espremer achégate entre 50 e 60 mg de vitamina C /100 g). Por outro lado, conteñen minerais como o potasio, calcio, fósforo e magnesio, ademais de pequenas cantidades de ferro, cobre, cinc e manganeso.

Ao comprar froita hai que comprobar que estea o máis fresca posible porque as pezas que se recollesen hai máis tempo xa terán perdido moitas vitaminas. Tomar zumes como complemento da dieta axúdate a asimilar o resto dos alimentos, grazas ao seu alto contido de encimas, que contribúen á transformación e o proceso metabólico dos alimentos. Pero hai que ter en conta que estas encimas se destrúen coa calor da cocción, polo que é indispensable que, á hora de consumilos como zume, se licúen en cru. 

Consumir inmediatamente

A solución máis sinxela consiste en que os prepares pouco antes de inxerir e, unha vez elaborados, os tomes inmediatamente para que non se resinta o seu contido nutricional. Non se recomenda gardalos durante moito tempo porque as vitaminas son moi sensibles a axentes físico-químicos como a luz, a temperatura ou o osíxeno e, igual que sucede cos minerais, oxídanse en contacto co ar. Entre as vitaminas que poden quedar inservibles atópase o ácido fólico, a vitamina C, a E e a B6. Transcorridos entre 20 minutos e media hora, aínda que o zume manteña o seu sabor, as vitaminas teríanse perdido. 

Ademais de lavar ben as pezas, outro dato a ter en conta é que se vas pelar a froita para facer zumes na licuadora, non convén quitarlle a pel con moita antelación, porque o contacto directo da polpa co ar tamén contribúe a eliminar vitaminas. 

O tempo de almacenamento tamén afecta negativamente ás calidades destes zumes, que poden chegar a perder parte das súas propiedades se transcorre un espazo prolongado desde a súa preparación e ata o momento de ser inxeridos. Neste sentido, non é moi aconsellable gardar no frigorífico un zume xa preparado, con idea de consumilo ao día seguinte.

Este proceso de oxidación pódese retrasar engadindo unhas gotas de zume de limón ao que xa preparaches. Hai quen elixe conservar a bebida no frigorífico, pero non debes esquecer que, de calquera forma, o proceso de dexeneración do zume non se detén. Un truco para que conserves os nutrientes do zume é conxelalo e preparar así deliciosos “polos”, especialmente indicados na época estival. 

Porén, en época invernal, o problema pode presentarse cando ao ir espremer a froita pola mañá, esta estivo toda a noite nun lugar fresco e, ao preparar a bebida, pode quedar demasiado fría. Unha solución, especialmente indicada no caso das laranxas, é que as introduzas durante uns segundos no microondas. Deste xeito, as pezas de froita tempéranse e o zume resultante xa non estará tan frío como nun principio. 

Cando tomalos

A primeira hora da mañá, unha media hora antes de inxerir o almorzo, un bo zume proporciona enerxía, refresca e limpa o estómago. A media mañá, podes tomalo como unha axuda para manter o corpo en forma que, ademais, serve para contrarrestar os excitantes que conteñen algunhas bebidas como o café ou o té. 

O máis aconsellable é tomar zumes acabados de facer entre comidas e co estómago baleiro. Cómpre inxerilos unha media hora antes de comer porque, non só as súas vitaminas se absorben mellor, senón que constitúe un aperitivo hipocalórico, moi recomendable se non queres tomar alcohol ou bebidas con gas. Algúns zumes tamén teñen propiedades relaxantes e axudan a concluír a xornada cun descanso reparador. 

Artigos relacionados

- A froita, antes ou despois das comidas?

- Unha dieta ben vitaminada