Repsol YPF

Na elaboración das croquetas un punto fundamental é a preparación da masa, unha bechamel espesa á que se lle engade o recheo, ben picado e que logo hai que deixar arrefriar durante varias horas, incluso dun día para outro.

Tradicionalmente as croquetas preparáronse recheas de xamón serrán, chourizo, atún ou ovo cocido. Porén, son un alimento que dá moito xogo e que varía notablemente, en función do ingrediente co que as fagas.  

Cociña clásica… ou moderna

Podes enchelas con produtos cotiás como polo, queixo normal ou de Cabrales, bacallau con perexil e allo picado, pequenos anaquiños de salmón afumado, coliflor con touciño ou morcilla. Estas últimas prepáranse quitándolle o pelexo ás morcillas e cortando cada peza en pequenos anacos que se pasan por ovo batido e pan relado. Frítense a lume medio e, cando estean douradas, sérvense con salsa de tomate. 

Pero se se trata de organizar un cátering máis sofisticado, unhas croquetas recheas con crema de marisco, gambas e incluso combinacións máis elaboradas como porros con cebola confeitada ou tomates deshidratados e alfabaca, achegarán un toque distinto á túa mesa. 

Outra posibilidade son as croquetas de troita, acompañadas dunha salsa pesto de coriandro. Para elaborar este acompañamento sofrítense allo e cebola ata que se douren e bótase cun pouco de coriandro nun batedor, engádeselle aceite de oliva pouco a pouco para emulsionalo. Por outro lado, machúcase queixo parmesano con améndoas  ou piñóns ata obter unha  pasta e esta agrégaselle á salsa.

Receitas vexetarianas

Algunhas destas receitas están especialmente indicadas para aquelas persoas que seguen unha dieta vexetariana, como as croquetas de porro se ovo cocido. O recheo faise salteando os porros en aceite de oliva, aos que se lle engade margarina, fariña integral e leite xunto cos ovos cocidos relados, pementa, noz moscada e sal de herbas. Como noutros casos, esta masa déixase arrefriar durante unhas horas, antes de rebozar e fritir. 

Tamén se poden cociñar elaborando unha bechamel á que se lle engaden acelgas e cabaciña (ou cenorias, ervellas...) cocidos ao vapor, xema de ovo, queixo relado, pasas e piñóns. 

Con sabor internacional

No mundo árabe, prepárase o falafel, unhas exquisitas croquetas vexetarianas que se consumen en Oriente Medio e outros países árabes. Trátase dun prato que contén unha variada cantidade de especias e a súa base son os garavanzos, aínda que en países como Exipto, é costume engadirlle cebola e trigo. O falafel consúmese a calquera hora do día, como entrante, para picar, como prato de acompañamento e incluso como cea. 

Para elaboralas, déixanse a véspera a remollo con auga. Ao día seguinte, tritúranse garavanzos con perexil, cebola, allo e coriandro. Tamén se lle acostuman engadir fabas. Nesta masa inclúese un pouco de comino e pementa negra, vólvese triturar e déixase repousar. Posteriormente dáselles forma redonda cun molde e frítense en aceite de oliva ata que queden douradas. 

Á hora de presentar na mesa, o falafel acostúmase acompañar de varias cremas, a homoos, (unha crema de garavanzos), a baba-ganug (crema de berenxenas) e a crema petra, elaborada con pementos vermellos e noces. Tamén é típico introducilas dentro de pans árabes con rodas finas de tomate e cogombro, un pouco de leituga, cebola e un pouco de picante.  

O arroz, protagonista

Outra posibilidade de cociñar as croquetas é con arroz, o que na illa de Sicilia se coñece como os populares arancinis. Prepáranse con arroz arbóreo ou de gran corto como se fose un risotto, ao que se lle engade azafrán previamente disolto nun pouco de auga tibia. A este arroz engádense dous ovos batidos, dúas culleradas abundantes de queixo relado e a fariña necesaria ata conseguir que se forme unha pasta.

Esta mestura déixase arrefriar sobre unha superficie limpa e aceitada, estendéndoa cunha culler de madeira e logo énchese con pequenas ervellas frescas, fervidas ao dente con salsa boloñesa ou, se se prefire, con espinacas picadas fervidas. Unha vez recheas as croquetas, pásanse por fariña e ovos batidos e frítense en abundante aceite. 

Artigos relacionados

- Lasañas 

- Petisco entre amigos