Repsol YPF

Ademais, a oferta actual multiplica as opcións e pon ao alcance numerosas variedades. Desde hai miles de anos, os cereais foron a base do sustento das civilizacións e aínda que se poida pensar que as numerosas variedades de pan que existen no mercado son unha novidade dos últimos anos, o certo é que no século II d.C. xa se coñecían máis de setenta formas de elaborar este alimento cotián. 

Exipto xa contaba con grandes colleitas de trigo 5.000 anos A.C. e os gregos eran tamén panadeiros que fabricaban unha galleta de pasta sen lévedo feita a base de trigo. Nun paseo pola Grecia clásica podíase optar por comprar pan de centeo, de avena, de trigo negro, de salvado exipcio … elaborados de diversas formas, tanto cocidos en molde como feitos entre dúas pranchas de ferro ou amasado con leite e especias. 

Numerosas variedades
Na actualidade, o pan adáptase ás esixencias do consumidor. A súa composición depende dos ingredientes empregados, comezando pola fariña. A variedade que máis se consume é a barra, elaborada a base de trigo na súa maior parte, seguida da baguette, de orixe francesa, un pan moi dixestivo e o máis usado en restauración, en concreto á hora de preparar bocadillos. En terceiro lugar atópase a chapata, de orixe italiana e formas planas, moi apreciada tanto para acompañar as comidas como para bocadillos. 

Os establecementos tamén poñen á venda pan integral, elaborado con fariña integral e rico en fibra. Caracterízase porque tanto a súa codia como a miga son máis escuras que o pan branco e conta con moitas variedades.  O artesán de leña é un pan de gran consistencia, codia dura e miga bregada, que se fai con fariña especial.

No tocante ao pan de salvado de trigo fabrícase xeralmente cunha fariña branca, refinada, co engadido de salvado. O pan de molde é o elaborado con fariña máis branca, á que se lle engade azucre e outros produtos lácteos, co fin de conseguir unha miga máis esponxosa. Ten forma de rebada e é especial para preparar sandwiches. Tamén existe o pan de cereais, composto por fariña de centeo e doutros cereais, como o millo ou a soia. Para enriquecer o seu sabor acostuma decorarse con sementes, copos de avena ou outros ingredientes, co que tamén resulta máis vistoso. 

As pequenas vienas teñen unha forma achatada e elabóranse con glute, fariña de malte, amilasas e trigo, o pan de hamburguesa ten, ao igual que o pan de molde, unha textura suave e esponxosa.  Finalmente atópase o pan sen sal, especialmente indicado para as persoas que deban excluír este condimento da súa alimentación así como pan especial para celíacos, elaborado sen glute, unha proteína presente nos cereais que acostuma empregarse na elaboración do pan. 

Outra variedade ligada a problemas no organismo é o pan verde que, ademais dos ingredientes normais, acostuma incluír outros como o centeo, a fariña integral de trigo, as pipas de xirasol que conteñen moitas fibras e ácidos graxos saudábeis, os copos de avena, algo de millo ou as sementes de sésamo, rico en aceite comestíbel e saudábel. Estes ingredientes, máis ou menos triturados, contribúen a eliminar os problemas de estrinximento. 

Acompañamento de receitas
Entre todas estas distintas modalidades pódese elixir á hora de confeccionar un menú, para acompañar as receitas con aquel tipo de pan que mellor combine. Así, para acompañar aos embutidos e queixos, recoméndase o pan de trigo e as fogazas rústicas, mentres que para untar os patés é preferíbel o pan de millo polo seu matiz doce e elixir os morenos e integrais como o mellor acompañamento das verduras. Os peixes poden servirse acompañados da barra clásica e as carnes xunto con pans de miga dura, moi traballada, de masa moi branca e preta, sen esquecer a chapata, excelente para acompañar os guisos invernais. O propio pan é a base dalgunhas receitas típicas como a sopa de allo, as migas estremeñas ou a zurrukutuna ou pan con bacallau. 

A localización xeográfica tamén implica un pan con determinadas características. Un exemplo constitúeno as baguettes francesas. O pan é a demostración de cómo, a partir duns poucos ingredientes básicos pódense conseguir infinitas texturas e sabores. En España existen máis de 300 variedades deste alimento, entra as que destaca a barra, a antedita baguette, o pan gallofa, esponxoso e especialmente indicado para facer torrixas e as fogazas, un pan de intenso sabor, ambos típicos de Castela-León, a bóla galega, o pan de payés, típico de Cataluña e Baleares, feito con pouco lévedo e sen sal, o panchón unha fogaza asturiana esmagada e estriada de cor branca, a crocante codia e a miga valeira do pan de Cinta, propio de Aragón, as opillas, propias do País Vasco e Navarra, consistentes nunhas fogazas nas que se poñen ovos duros e que tradicionalmente regalan as madriñas do bautismo aos seus afillados o día de San Marcos, sen esquecer algúns de soleira como o pan bendito de Albacete, a pataqueta de Valencia ou o lechugino de Valladolid.