Repsol YPF

É onde máis se ve a influencia do océano en multitude de delicias gastronómicas que teñen como elemento principal o peixe en calquera das súas formas. Os tempos están a cambiar e a influencia doutras cociñas internacionais fixo que, ultimamente, se tenda a presentar os peixes apenas cociñados, algo que hai uns anos era impensábel. Non obstante, ao achegarse ás zonas de porto da xeografía española e aos lugares nos que se prepara o que se coñece como cociña popular, pódese atopar peixe cociñado dun xeito artesanal, que consegue un exterior case crocante e un interior perfectamente substancioso. 
 
En Galicia, a pescada fresca é un dos alimentos que non poden faltar na mesa, ademais do rodaballo, peixe sapo, linguado e outras especies de peixe azul e branco. Pero, sen dúbida, un dos pratos estrela da súa gastronomía é o polbo á galega. A elaboración do polbo faise de xeito sinxelo. A súa carne é moi dura, polo que se recomenda conxelar para abrandala. Adóitase cociñar cocido e condimentado con sal, pemento picante e aceite de oliva. Outro prato que ocupa un lugar destacado é a caldeirada de peixe á galega, unha das mais típicas receitas desta cociña que preparan os mariñeiros cando se atopan faenando en alta mar. É moi sinxela e pode elaborarse con calquera tipo de peixe branco ou azul que sexa de cocer. A pescada, peixe sapo ou a raia serven perfectamente para esta receita.
 
Sorropotún en San Vicente
Avanzando na xeografía, os fogóns de Santander, Santoña, Laredo, San Vicente de la Barquera ou Castro Urdiales preparan delicias como a pescada en salsa verde, as angulas, os bocartes en cazola, o ollomol ao forno ou ao lombo ou as luras enceboladas, sen esquecer o bonito, o peixe sapo ou as ameixas á cazola. As sardiñas asadas e o cabracho, tanto ao forno coma á prancha,  tamén adoitan formar parte de deliciosos guisos mariñeiros, entre os que destaca o Sorropotún de San Vicente de la Barquera, un preparado de bonito con patacas.
 
O peixe (en concreto o bacallau) e os mariscos frescos son, entre outros, produtos fundamentais da dieta catalana. Dentro da súa gastronomía atopamos as grelladas, ameixas á mariñeira, o  bacallá á llauna (bacallau condimentado nun recipiente de lata) e a zarzuela, un prato de mero, peixe sapo, lagostinos ou gambas, luras e mexillóns que pasa a denominarse ópera se leva lagosta en lugar de lagostinos. Tamén se poden degustar o suquet de peix, unha caldeira de diversos peixes, que xeralmente se prepara con peixe sapo e mero, engádenselle tamén cigalas ou  lagosta, rústrese con tomate e cebola e condiméntase  con diferentes pementas.
 
Nas zonas costeiras da Albufera pódese degustar o all-i-pebre d'anguiles, un prato elaborado a base de allo, pementa e guiso de anguías e é que, entre todos os peixes, tanto de mar coma de auga doce, os valencianos mostraron a súa preferencia por esta serpe de mar. Adoitan preparala de varias maneiras, por exemplo, anguías con salsa de allo e améndoas, outro produto típico da rexión. Ademais, e ao igual que os cataláns, inclúen na súa gastronomía o suc de peix, cocido a lume lento en recipiente de barro. En Benidorm, por outra parte, atopamos o pebrot,  un prato típico mariñeiro que se prepara con lampuga, un peixe azul cociñado frito con pementos, allos e loureiro.
 
Entre dous mares
A confluencia do océano Atlántico co mar Mediterráneo fai que a cociña andaluza encha os seus fogóns dun número interminábel de peixes, como o atún vermello, que alcanza a máis alta valoración internacional dos peixes. Pescadas, linguados, bocartes, robalizas, salmonetes, sardiñas, xunto con mariscos, todo se pode consumir en fritura, á prancha, ao sal, ao forno, simplemente cocidos ou guisados en receitas como o atún encebolado ou os guisos de melva. A cociña andaluza é coñecida sobre todo polo pescaíto frito, o produto gastronómico propio dunha rexión de longa costa e abundante produción aceiteira. En Málaga son famosos os espetones de sardiñas (asadas en cana), a sopa de peixe sapo ou o atún mechado á malagueña. En Cádiz destacan os guisos mariñeiros, o excelente marisco de Sanlúcar de Barrameda e as luras na súa tinta. Entre os guisos de peixe de Huelva atópanse as sardiñas en pementa, o atún con tomate, os chocos con fabas, o prago encebolado, o peixe de espada en amarelo, a raia en pemento e as ameixas con arroz.