Repsol YPF

Un clásico irresistíbel ao longo de todo o ano, e tamén nos meses estivais pode atoparse na gastronomía, especialmente en sobremesas e batidos.

Coas calores do verán, os batidos sempre resultan agradábeis e refrescantes, ben como refrixerio  ou ben para complementar unha comida. Son un excelente complemento na dieta porque se trata do alimento que posúe unha maior densidade de calcio. Tomando diariamente un vaso deste produto, cóbrese máis da terceira parte do calcio que necesita o organismo e ademais contén diferentes tipos de proteínas, entre elas, a caseína, con propiedades anticanceríxenas.
 
Pola súa banda, o chocolate é un comodín para as sobremesas, que permite elaborar innumerábeis receitas e, aínda que contén graxas e calorías, é difícil poder resistirse a el. Unha idea, especialmente para aquelas persoas que queiran seguir unha dieta sen remordementos de conciencia, é tomar batidos de chocolate baixos en calorías, que achegan apenas 40 calorías por bebida. Un vaso de 200 ml de leite con chocolate achega 136 calorías e tan só 3 gramos de graxa.
 
Para elaborar un saboroso batido caseiro, prepárase xeado de chocolate negro con leite nun batedor ata que estea semilíquido. Por outra banda, cóllese unha pastilla de chocolate puro, rélase e mestúrase co batido. Se se quere conseguir máis escuma, levantarase  o brazo do batedor a medida que a máquina bate e logo servirase nun vaso alto cunha palliña. Pódense engadir un par de gotas de ron antes de rematar de bater, ou tamén poñer un pouco de nata enriba do batido, e así queda delicioso. Pero, sobre todo, é importante que se sirva sempre moi frío e que se consuma pronto porque, tendo en conta as calores estivais e que contén leite, pode estragarse con facilidade.
 
A mousse rápida e sinxela
Dentro do apartado das sobremesas, hai un amplo abano de opcións. Pódese preparar unha mousse de chocolate rápida e sinxela. Para iso, tórase o chocolate nun recipiente,  engádese leite e quéntase ao baño maría. Sepáranse as xemas de 3 ovos e engádenselle á mestura. Despois, bátense as claras dos ovos e mestúranse co azucre ata obter unha mestura a punto de neve. Cando o chocolate está derretido, mestúrase con estas claras a punto de neve. Retírase do lume e mantense nun recipiente tapado con papel transparente. Posteriormente hai que mantelo no conxelador, unhas 2 horas a unha temperatura entre 1º e -5º C. Á hora de servilo, recoméndase facelo acompañado de froitas do bosque.
 
Tamén se poden preparar chulas de chocolate, para o cal son necesarios 100 gramos de chocolate fundido e outros 100 de nata líquida, que se mesturarán nun recipiente. Cando a masa se arrefríe, moldearanse manualmente bolas do tamaño dunha cereixa e meteranse inmediatamente no conxelador. Cando xa estean conxeladas prepararase unha masa tipo Orly e nela iranse rebozando as bolas antes de fritilas en aceite moi quente e abundante.
 
Brownies, outra alternativa deliciosa
Os brownies de chocolate son outra alternativa deliciosa. Para elaboralos, hai que poñer no microondas unha cunca con manteiga, auga e azucre ata que comece a ferver. Posteriormente, e tras remover a mestura, engádense cachiños de chocolate e vólvese quentar, removendo de cando en vez, ata que a mestura se desfaga. Engádense dous ovos, mesturándoos ben coa masa e, finalmente, agréganse  vainilla, fariña, fermento e sal. Un toque "extra" poden ser unhas noces picadas. Métese ao forno e, tras comprobar que está feito, déixase arrefriar e córtase en dadiños.
 
As tortas son outro clásico nas sobremesas e unha receita deliciosa é a de chocolate con xeado. Para elaborala, póñense dentro dun recipiente chocolate, manteiga e leite e quéntanse a baño maría sobre un lume lento ata que se funda todo. Posteriormente quítanse do lume e engádenselle azucre e coco relado. Colócase toda a mestura nunha bandexa, comprímese e déixase arrefriar no frigorífico durante polo menos dúas horas. O toque final é colocar enriba o xeado, do sabor que se prefira. Unhas follas de menta fresca poden ser o adorno final.
 
Aínda que é un dos alimentos máis tentadores, o chocolate non é aditivo. 50 gramos de chocolate negro teñen case un 10% do requirimento diario de magnesio, un mineral necesario para a correcta absorción de calcio.  Ademais, os seus hidratos de carbono utilízanse para producir serotonina no cerebro, que contribúe a producir relax e benestar. É verdade que contén cantidades importantes de graxa, pero non todo é negativo.