Repsol YPF

O turrón, é as súas múltiples variedades é unha das sobremesas que nunca faltan na mesa pola época de Nadal. Pero tamén acostuma ser frecuente que rematen as festas e queden en casa excedentes deste doce. Para aproveitalos, pódese elaborar con eles flan de turrón, unha sobremesa que admite diversas variacións. 

Disólvese un sobre de xelatina neutra nun vaso de leite (uns 200 ml. aproximadamente). Córtase unha libra de turrón de Xixona e bátese cun medio litro de leite ata obter un puré. Ponse a quentar e cando ferva, retírase do lume e incorpóraselle o vaso de leite coa xelatina disolta. Bátese ben e compróbase o punto de azucre. Se é necesario, engádeselle un pouco máis. Prepárase unha flaneira co caramelo fundido, bótaselle a mestura no seu interior e déixase arrefriar na neveira para que calle. Cando estea ben frío e no seu punto, desmóldase. 

Se se quere evitar que sexa unha sobremesa altamente calórica, pódese utilizar leite desnatado, substituír o azucre por frutosa para elaborar o caramelo e empregar como ingrediente principal un turrón “sen azucre”. 

Flan e copa de turrón
Unha variante que inclúe varios ingredientes máis é triturar o turrón ben fino e pór nun recipiente a masa resultante con leite evaporado, leite condensado, ovos, noz moscada e vainilla, batendo todo ata conseguir unha masa homoxénea. Prepárase o caramelo a lume lento sen que se queime, bótase no molde do flan e déixase arrefriar. Cando estea completamente frío, incorpórase a masa no molde. Enfórnase ao baño María durante media hora a 175 ºC e, unha vez que baixe a temperatura, voltéase nun prato e métese na neveira para logo servilo frío.

Outra alternativa é a copa de turrón de Xixona. Nun batedor mestúrase ben leite, azucre e o turrón. Resérvase unha cunca de leite e nela disólvense dous sobres de callada, engádense a medio litro de tona que previamente se quentou nun cazo e mestúrase ben. Logo incorpórase esta mestura coa do turrón e quéntase todo, sen deixar que chegue a ferver. Bótase en copas individuais, déixase arrefriar e métese na neveira ata o día seguinte. Á hora de servilo pódese adornar con relas de chocolate ou améndoas  torradas picadas.

Alternativas ao roscón
O tradicional roscón de Reis é outro doce que en ocasións queda sen terminar. Para aproveitalo, existen diferentes alternativas, algunhas tan sinxelas como cortalo en rodas, untalas con manteiga e pólas a torrar, como complemento do almorzo ou incluso como acompañamento dunha cunca de chocolate na merenda. 

Antes de que se bote a perder, tamén se pode elaborar un sinxelo pudding. Córtase e ponse a remollo en leite. Por outra parte bátense uns ovos, mestúrase todo, bótase nun molde con caramelo e ponse este ao baño maría. Deste xeito pódese obter pudding de roscón de Reis. 

Tamén se pode cortar o roscón en anacos dun dedo de grosor. Estas rebandas réganse cun pouco de anís, engádeselles azucre por encima e métense no forno para que collan un pouco de color. Se se prefire, pódeselle botar chocolate fundido por encima en vez de azucre e agárdase a que esta capa se seque. Este doce coñécese como secalls. 

Outra maneira de aproveitar o roscón de Reis é preparar con el unha greixonera, receita típica da illa de Ibiza que tradicionalmente aproveitaba as ensaimadas do día anterior para a súa elaboración. Neste caso, tan só habería que substituír as ensaimadas polo roscón.

A greixonera toma o seu nome do recipiente no que se elabora, unha cazola de barro plana. É un pudding de sabor exquisito, perfumado con canela. Para a súa preparación precísanse ovos, leite, azucre, limón, canela e manteiga. Cócese o leite e despois déixase arrefriar. Engádense os ovos ben batidos e as ensaimadas cortadas (neste caso os restos do roscón), o azucre e un pouco de cáscara de limón relada. Úntase un molde con manteiga e bótase no seu interior a mestura. Introdúcese no forno, a temperatura moderada, durante media hora aproximadamente. Cando arrefríe desmóldase e bótaselle por riba canela. 

Artigos relacionados:

- As sobremesas esquecidas

- Torradas, doces de pan e ovo