Repsol YPF

A acción depurativa dunha dieta rica en froitas e verduras baséase no seu alto contido de auga e fibra, a súa riqueza en potasio e baixa achega de sodio. Desta forma, inxeridas diariamente, contribúen á eliminación do exceso de líquidos e de toxinas presentes no organismo. 

No tocante ás verduras, non hai que esquecer que a súa riqueza en vitaminas e minerais pode verse notablemente diminuída se se cociñan. Por iso recoméndase consumilas crúas en forma de ensalada, polo menos unha vez ao día e en caso de cociñalas, o mellor é fervelas ao vapor cunha cullerada de aceite de oliva ou asalas á papillote. 

O inverno é unha boa tempada para preparar receitas a base de canónigos, endivias ou porros. Estes últimos resultan unha verdura lixeira, moi sa e con poucas calorías. Son un magnífico reconstituínte debido ás súas porcentaxes de vitaminas B, C e minerais e tamén teñen propiedades laxantes. O caldo de porros descansa e tonifica o estómago. 

O fiúncho e o apio son as verduras máis depurativas. O bulbo do fiúncho acostuma comerse cru, fervido ou cocido ao vapor para aproveitar as súas vitaminas (A e C) e  diversos minerais. Ademais de mellorar a dixestión, é un excelente diurético e limpador renal que axuda a expulsar as toxinas do organismo. Tamén acostuma recomendarse porque é saciante, rico en fibras, axuda a dixerir ben as graxas e contén poucas calorías. 

Verduras depurativas
O apio, pola súa parte, ademais de ser un potente diurético e depurativo, contén poucas calorías e un alto valor nutritivo. É mellor tomalo cociñado, en cremas, guisos de carne ou ensaladas, porque se se inxire unha gran cantidade en cru pode resultar indixesto. Ademais, o aceite esencial do apio exerce un efecto dilatador sobre os vasos renais e este favorece a eliminación de auga e substancias tóxicas nos  ouriños. 

Os canónigos son outra verdura de alto poder depurativo e diurético, ademais de achegar poucas calorías. O seu sabor lembra ao das noces e acostuma utilizarse sempre en cru. Engádese xusto antes de servir o prato ou incluso despois de aliñalo cunha vinagreta moi suave, porque o calor e os condimentos fortes a deterioran rapidamente e a súa textura estrágase. No tocante ás endivias, cenorias, acelgas ou espinacas, todas elas son alimentos nutritivos baixos en calorías pero cun alto poder dixestivo, indicadas para aliviar os problemas estomacais. 

O alto contido en auga das froitas, en torno ao 90%, fai que a súa porcentaxe calórica sexa bastante baixa. Isto sumado a que son alimentos ricos en potasio, convérteos en alimentos refrescantes e cunha importante acción diurética, depurativa e desintoxicante do organismo. 

Zumes cheos de vitaminas
Xaneiro é o momento dos cítricos. Laranxas, limóns, pomelos e mandarinas ofrécense zumarentos e cargados das vitaminas que tanto se precisan neste comezo de ano. Cheos de sabor en zumes recentemente espremidos,  deben tomarse no momento de ser feitos para aproveitar ao máximo as vitaminas que conteñen. Tamén se empregan en recheos ou gornicións de carnes, caza ou peixe e para elaborar sobremesas como tortas, biscoitos, xeados ou mousses. 

Dentro das coñecidas como “froitas de inverno”, a piña é unha elección moi adecuada xa que estimula a produción de xugos gástricos e axuda a dixerir as comidas. Posúe unha encima, a bromelina, que fragmenta as proteínas e convérteas en aminoácidos, o que favorece o proceso dixestivo. 

Verdes por fóra e brancas por dentro, as saborosas peras de auga e as chirimoias tamén están no seu mellor momento e a súa doce e saborosa polpa é unha alternativa dentro da alimentación. Ademais de poder degustarse en cru, ambas acostuman empregarse na elaboración de sobremesas e marmeladas. 

As uvas son outra froita con propiedades beneficiosas para a saúde, da que se pode sacar partido nestas datas. Son moi recomendábeis porque depuran o organismo e teñen un efecto desintoxicante. Aínda son datas para degustar a Aledo, coa que habitualmente se brinda en Noitevella. 

Esta variedade recoléctase desde mediados de novembro ata mediados de xaneiro e é unha froita que conta coa peculiaridade de que chega aos consumidores cos seus acios recubertos de bolsas protectoras que, ao protexerlles das inclemencias do tempo, fan que desenvolva unha pel máis fina e uns grans de cor máis uniforme.