Repsol YPF

Achéganse datas entrañables nas que as familias se reúnen. Son días nos que moitas veces, o desexo de quedar ben cos convidados fai que se produzan importantes gastos á hora de adquirir os produtos que conformarán o menú de Nadal. 

Pódense preparar menús imaxinativos que non sempre se teñen que elaborar en base aos ingredientes típicos das datas, aínda que hai certos produtos como o marisco, o peixe, a carne e os doces que invariablemente aparecen, o que favorece que os seus prezos se incrementen de maneira considerable. 

Anticiparse ao encarecemento
Para evitar que o noso peto se resinta, é importante planificarse con antelación e adiantarse, realizando as compras con tempo, xa que moitos produtos se poden conxelar e outros se compran directamente conxelados ou ben enlatados, co que tan só hai que gardalos ata o momento no que se precisen. Hai que estar atento ás datas de caducidade e non romper a cadea de frío nos produtos conxelados. Desta forma, pódense utilizar nas festas sen que perdesen en absoluto a súa calidade.

Máis da metade dos españois agarda ata o último momento para facer as súas compras de Nadal e tan só 1/3 decide adiantalas ao mes de novembro. Porén, a maioría dos produtos que se encarecen nas festas de Nadal pódense adquirir con semanas e, incluso, meses de antelación, conséguense mellores prezos e máis variedade de produtos. Recoméndase realizar as compras antes do 15 de decembro porque a partir desta data algúns produtos sofren un considerable incremento. 

Débese ter moi claro á hora de comprar como elixir os alimentos, calcular as cantidades que se vaian consumir, evitando desbaratamentos innecesarios e inxustificados e que a comida ao final acabe no lixo. 

Non hai que se deixar levar pola ledicia das datas ou a presión publicitaria e comparar a relación calidade/prezo dos produtos en diferentes establecementos antes de facer as compras porque un mesmo artigo pode presentar diferenzas de prezo considerables. Tamén se debe vixiar a calidade, hixiene e manipulación dos alimentos que logo se vaian conxelar.

Cociñar e conxelar
Ademais de comprar determinados ingredientes con antelación, se se ten tempo e un frigorífico con capacidade pódense guisar algúns dos pratos que conformarán o menú. Convén preparar tan só o que se vaia consumir, en racións pequenas, sen encher a tope o conxelador porque o ar frío debe circular entre os alimentos. 

Cómpre manter a temperatura entre 0 e 5 º C para impedir a multiplicación de microorganismos e especialmente para evitar a contaminación cruzada, convén separar os alimentos crus dos cociñados. Os primeiros débense gardar na parte baixa do frigorífico e os preparados, nas baldas superiores. Os pratos preparados a véspera non precisan se conxelar, basta con refrixeralos. 

En canto aos protagonistas da mesa, os mariscos non se deben consumir crus e á hora de adquirilos teñen que presentar a súa correspondente etiqueta de depuración. O marisco débese comprar vivo, recoméndase elixir as pezas de olor agradable e intenso e consumilo o antes posible. Unha alternativa é adquirir marisco conxelado e incluso cocido, co conseguinte aforro de tempo no peto e na cociña. 

O peixe, por outra parte, si se pode adquirir con anticipación, pero sempre observando que os ollos estean brillantes, as galadas teñan unha cor forte, coas súas láminas separadas e a súa carne sexa dura e consistente. Non hai que esquecer que o peixe conxelado nas condicións axeitadas, ten o mesmo valor nutritivo que o fresco.

A carne ocupa tamén un lugar preferente nos menús de Nadal e é outro produto que se presta a ser conxelado, co que tamén se pode adquirir en datas previas a prezos máis económicos. Pódese envasar ao baleiro e conxelar a continuación. Neste caso, hai que ter en conta que a desconxelación será lenta. 

Outros clásicos como o turrón e o champaña ou o cava tamén se poden adquirir sen agardar ao último momento xa que a súa caducidade o permite sen problemas.