Repsol YPF

Antes de que o butano irrompese con forza nos domicilios, a maior parte dos fogares españois empregaban o lume do chan para cociñar. Sobre este lume colocábanse grandes caldeiros de tres patas ou pucheiros de barro e tamén era frecuente atopar recipientes de cobre colgados de cadeas que pendían da cheminea. 

Esta imaxe, que evoca as pequenas aldeas e as vilas de comezos de século, complementábase coa forma de cociñar que se estilaba nas cidades, onde se empregaban fogóns altos, que foron derivando na cociña económica, amplas chapas en cuxo interior se quentaba o lume e sobre as que se colocaban os recipientes de cociña. 

No ano 1957 xurdiu Butano S.A. unha empresa que nacía coa idea de comercializar butano envasado, ao igual que xa se facía noutros países de Europa. Trátase dun gas licuado, procedente da destilación do petróleo e composto principalmente por butano normal (60%), propano (9%), isobutano (30%) e etano (1%). 

Aforro de tempo

A chegada do butano trouxo consigo un importante aforro de tempo para quen ata ese momento tiña que investir un bo número de horas a diario para manter o lume acendido. Ademais, non só comezou a empregarse na cociña, senón tamén para obter auga quente. 

As cociñas de butano convertéronse nunha opción excelente, xa que ao posuír unha potencia máis rápida que outros tipos de enerxía, permitían regular manualmente a lapa a vontade, de forma instantánea, conseguindo a calor necesaria de forma rápida e precisa. Ademais, o butano envasado nas súas características botellas laranxas duns 12,5 quilos, pronto comezou a chegar a puntos xeográficos onde outras enerxías non alcanzaban.  

O butano conta con diversas vantaxes na cociña. É un combustible que respecta o ambiente, xa que a súa lapa é moi limpa e produce unha menor emisión de gases contaminantes (carece de emanación de monóxido de carbono), sen fumes, residuos nin malos olores, en comparación con outras fontes de enerxía. Ten un elevado poder calorífico e un alto rendemento, co que a súa relación calidade-prezo resulta excelente.  

Pode empregarse para uso doméstico tanto en interior como exterior. Supón unha das fontes de enerxía máis baratas do mercado se se compara con posibles alternativas. Incluso con todos os lumes funcionando á máxima potencia, unha cociña deste tipo consume menos que outras variantes. Os expertos chegan a considerar un aforro enerxético entre un 30 e un 50% por encima das cociñas eléctricas. Ademais de instantánea e eficiente é tamén fácil de transportar. 

Modernos gasodomésticos

O butano na cociña emprégase preferentemente para preparar os alimentos. A súa capacidade para conseguir altos niveis de calor con rapidez e a distribución homoxénea do mesmo permiten que os alimentos se cociñen con temperaturas máis ou menos baixas nun breve espazo de tempo. Unha das súas vantaxes é que permite utilizar recipientes de barro e ademais, ao ter queimadores que se poden regular en intensidade, pódese controlar o proceso de elaboración e quentar máis rápido en caso necesario. Desta maneira convértese nunha forma de elaborar as receitas moi axeitada, xa que os produtos manteñen a súa textura e conservan todas as súas vitaminas e nutrientes. 

No eido da cociña pódense atopar modernos aparellos como a vitrogás (PDF), constituída por varios queimadores, unha cámara de ar e pechada por arriba por un cristal cerámico. Cando combustiona o gas, o queimador proporciona unha radiación infravermella que choca perpendicularmente coa placa cerámica e produce temperaturas que poden chegar ata os 200ºC. 

 Porén, nos últimos tempos o butano pasou tamén a empregarse como forma de funcionamento en electrodomésticos de liña branca. Os frigoríficos a gas (PDF) basean o seu funcionamento no sistema de absorción mediante o cal, un queimador subministra calor e así se produce o frío necesario para que os alimentos se conserven en óptimas condicións. Ao tratarse de electrodomésticos que carecen de motor, aseguran un absoluto silencio e así mesmo, garanten a total ausencia de avarías mecánicas. 

Artigos relacionados

- Produtos e servicios