Repsol YPF

Non cabe dúbida que o frigorífico é un dos electrodomésticos que máis revolucionou o mundo do fogar. A posibilidade de contar cun espazo de frío continuo que conserva os alimentos contribuíu a cambiar a nosa forma de vida e tamén os hábitos de consumo.  

Por outra parte, os últimos anos están asistindo a unha gran diversificación en canto á oferta que se atopa no mercado. Existe unha tendencia a comprar frigoríficos cada vez máis grandes, modelos con dúas portas e un espazo amplo para conxelados. 

O verán tamén é o momento no que aumentan as compras de neveiras portátiles, unha alternativa interesante cando se planea pasar o día fóra. Existen modelos que funcionan a gas e carecen de motor, co cal non hai problema de ruídos nin vibracións. Poden chegar a ter unha capacidade de 35 litros e dispoñen de rodas que facilitan o seu transporte. 

Na actualidade, a compra diaria foi substituída pola semanal ou mensual, na que se inclúen grandes cantidades de alimentos conxelados, o que supón ter que dispor, incluso, de arcas conxeladoras extra. O poder calorífico do gas tamén se emprega para arrefriar e no mercado pódense atopar arcas conxeladoras abastecidas con esta fonte de enerxía. Este tipo de electrodomésticos resulta interesante se é unha casa cun elevado número de persoas, pero se os seus habitantes son poucos pódese adquirir un modelo de dimensións máis reducidas, que sempre resulta máis económico. 

Atrás quedaron as neveiras clásicas cun pequeno conxelador, e é que, o espazo dispoñible acostuma ser un dos principais condicionantes á hora de elixir o tipo de frigorífico. As vantaxes destas neveiras de dúas portas son o seu baixo prezo e consumo. Porén, teñen un escaso rendemento, hai que regular a temperatura entre compartimentos e non son aconsellables nun domicilio onde vivan máis de catro persoas. 

Outras opcións son os “combis”, co frigorífico arriba cun acceso fácil e o conxelador abaixo organizado en caixóns, moi axeitado se precisas conxelar alimentos. Aínda que o seu prezo é máis alto, teñen un alto rendemento e permiten unha regulación independente entre os compartimentos. De feito, son unha das opcións preferidas á hora de adquirir un novo frigorífico. 

Nos combis, ademais do tradicional, existe outro tipo de frigorífico que funciona co sistema no frost. Consegue un funcionamento do conxelador sen que se forme carazo nin condensación e conta cunha temperatura uniforme en todas as bandexas para prolongar a frescura dos alimentos. O problema deste sistema é que reseca levemente os alimentos, así que resulta imprescindible empregar envases ou envoltorios protectores. Estes modelos arrefrían rapidamente,  porén o seu consumo acostuma  ser elevado. 

Durante os últimos anos apareceron algúns frigoríficos con servizos de domótica, que permiten mediante Internet ou SMS programar o electrodoméstico para que realice unha tarefa mentres non hai ninguén na casa.  

A estética é outro aspecto importante e, nese sentido, moitas veces interesa que sexan electrodomésticos panelables, isto é, que se poden cubrir con paneis a xogo coa decoración da cociña. Desta forma, o frigorífico queda camuflado entre o mobiliario da cociña.

Consumo enerxético

Hai un aspecto que cómpre ter moi en conta: o enerxético. Á hora de comprar un frigorífico debes observar se leva a súa correspondente etiqueta enerxética. Nela infórmase do seu consumo, o seu rendemento e ruído. A pesar de que o consumo non pareza elevado, non hai que esquecer que se mantén conectado de forma permanente, o que equivale a unhas 8.700 horas ao ano. 

Moitos modelos hoxe en día están equipados con compresores eficientes, que permiten un baixo consumo enerxético. Son os denominados electrodomésticos de clase A que  garanten un consumo considerablemente reducido (apenas o 30%) con respecto a modelos convencionais. Aínda que a primeira vista parezan máis caros, ao longo da súa vida útil poden supor o aforro de grandes cantidades de diñeiro na factura eléctrica. Tamén é importante saber canto tempo emprega o conxelador en arrefriar totalmente os alimentos. Canto menor sexa, mellor se conservarán as proteínas e vitaminas da comida.  

Artigos relacionados

- Envasar ao baleiro os alimentos de tempada

- Fornos e cociñas para unha vida máis fácil