Repsol YPF

Pero non é difícil conseguir unha redución do gasto deste electrodoméstico se se usa a plena carga, en ciclos económicos e a baixa temperatura. Para empezar, hai que saber que unha lavadora de clase enerxética A, a etiqueta máis eficiente, pode consumir menos da metade de enerxía que outra da clase G, a menos eficiente. Ao longo da súa vida útil pode aforrar en electricidade máis diñeiro do que custou.

Na última década, debido ao aumento no benestar das vivendas, a demanda enerxética no sector doméstico e de servizos aumentou preto dun 2% anual. Pero é posíbel gastar menos enerxía sen diminuír o confort nas vivendas. Trátase de fomentar o seu uso racional no fogar. Ademais, aforrar na factura enerxética contribúe ao mesmo tempo á protección do medio ambiente. 

Lavados razoábeis
Por isto, segue sendo necesario observar algúns consellos, como os que se expoñen a continuación, que permiten aproveitar a lavadora de forma aínda máis eficiente:

- O gasto enerxético dunha lavadora medio-chea é practicamente o mesmo que o de unha lavadora chea, ademais, canta máis roupa teña o tambor menos lavados se realizarán. Afórrase entre 1 e 2 kWh de enerxía e 100 litros de auga por cada lavado que deixa de facerse.

- Actualmente é posíbel elixir os produtos adecuados para cada tipo de roupa respectando o medio ambiente. O abano que se presenta cada día ofrece máis produtos adecuados para cada roupa. Nos últimos anos apréciase un aumento no consumo de deterxentes líquidos, non obstante o tradicional deterxente en po e as pastillas seguen acaparando o mercado. Polo xeral, o deterxente en po é máis eficaz contra as manchas en altas temperaturas. Pola súa parte, os xabóns líquidos respectan máis os tecidos, dilúense mellor, permiten tratamentos previos, ocupan menos espazo e son más suaves e aromáticos. O deterxente en pastillas ofrece a vantaxe de ser moi concentrado e resulta moi cómodo porque ocupa pouco espazo. É importante dosificar ben o deterxente. Non só é contaminante senón que se se usa en demasía o exceso de espuma fai traballar máis ao motor da lavadora. O motor traballa menos se se utiliza deterxente líquido. 

- Non hai por qué lavar sempre con auga fría pero si é conveniente escoller a temperatura mínima precisa para efectuar correctamente o lavado e elixir un programa o máis curto posíbel para deixar limpa a roupa. Desta forma o consumo de enerxía redúcese. O 80% da electricidade dun ciclo emprégase en quecer auga e só o 20% en mover o motor. Programar un ciclo de 60º C en lugar do de 90º C reduce o gasto enerxético á metade. Por outro lado, os programas curtos e económicos aforran moita auga. 

- O centrifugado a maior velocidade é moito máis eficaz e consume case o mesmo que un de menor velocidade.

- Limpar regularmente o filtro da lavadora fai que esta funcione mellor e aforre enerxía. 

Hábitos ecolóxicos
Os hábitos ecolóxicos no lavado contribúen á mellora medioambiental. Desde que se adquire a máquina ata que se compra o deterxente e enchúfase, tómanse unha serie de decisións importantes: tipo de aparello, envase, programas de lavado, temperatura da auga, cantidade e tipo de roupa, etc.

A Asociación Internacional de Xabóns, Deterxentes e Produtos Afíns (AISE) puxo en marcha hai anos un Código de Boas Prácticas Medio ambientais para paliar no posíbel o impacto medio ambiental dos deterxentes de roupa. Esta iniciativa require o compromiso dos fabricantes e a colaboración dos consumidores para conseguir unha redución do consumo de enerxía e de deterxentes. Entre os obxectivos que persigue atópase a diminución do número de envases e no aumento da biodegradabilidade das materias activas.

A AISE resume en cinco as recomendacións para os consumidores: 

• Reciclar os residuos dos envases. 
• Separar a roupa antes de lavar. 
• Non conectar a lavadora con pouca roupa. 
• Dosificar o deterxente en función da sucidade e da dureza da auga. 
• Lavar coa temperatura máis baixa recomendada.