Repsol YPF

Non é de estrañar pois que o custo en electricidade formulado en cifras dos fogares españois para facer a colada acade polo menos o 5% da factura total. No caso da lavadora, a maior porcentaxe do seu consumo destínase a quentar a auga, por isto, para aforrar no recibo eléctrico e reducir as emisións de gases causantes do efecto invernadoiro a acción máis efectiva consiste en lavar con auga fría, ou polo menos escoller aqueles programas de menor temperatura. Indubidabelmente eses son os ciclos que consumen menos enerxía.

Pero incluso antes de programar o aparello para facer a colada, a primeira decisión e máis importante para poder aforrar no gasto tomarase ao escoller a propia máquina. É importante decantarse polos equipos identificados coa letra A na etiqueta enerxética, é dicir, aqueles máis eficientes no seu consumo de enerxía. A escala vai ata a letra G. Estímase que os clasificados con eficiencia enerxética A son capaces de aforrar durante a súa vida útil respecto aos da clase G o consumo correspondente ao dunha familia media durante nove meses. 

Selección do programa
Do ciclo de lavado programado dependerá o resultado en limpeza da roupa, xa que poderá variar, polo menos, a duración e cantidade de produtos intervenientes no proceso, a temperatura da auga e as revolucións do tambor. Por tanto, non será o mesmo o gasto eléctrico nin, por suposto, de auga. Hai que saber ademais que unha dosificación adecuada do deterxente mellora o rendemento da lavadora.

A diversidade de programas de funcionamento que presentan as distintas marcas é moi ampla. Con todo, os programas fundamentais que ha ofrecer unha máquina para lavar a roupa son: programa económico, programa curto, programa de lavado con auga fría e programa a media carga.

Chegar a conseguir un óptimo uso da lavadora, obter unha redución do consumo de electricidade e auga non é difícil se se lava sempre a plena carga, en ciclos económicos e a baixa temperatura. Entre o 80 e o 85% da enerxía que gasta unha lavadora dedícase a quentar a auga. Por tanto, pasar de lavar con auga quente a temperada pode reducir á metade o consumo de enerxía en cada lavado. Por outro lado, empregar a lavadora ao máximo de capacidade suporá usala en menos ocasións, co conseguinte aforro. Xeralmente, a capacidade de carga das lavadoras é de 5 ou 6 quilos, aínda que as hai ata de 9.

Estes son os consellos xerais que permiten beneficiarse deste electrodoméstico da maneira máis ecolóxica e eficiente posíbel. Non obstante, xa existen aparellos dotados de sensores que axustan automaticamente a intensidade do programa á cantidade de prendas introducidas no tambor. Son máquinas deseñadas para tomar decisións intelixentes durante o lavado. 

Cuestións importantes
Á hora de escoller unha lavadora, hai que ter en conta que existen tres categorías de eficiencia enerxética do aparello: a eficiencia enerxética no lavado, a clase de eficiencia enerxética no centrifugado e o tipo de eficiencia enerxética xeral. A clasificación é a mesma que no caso da eficiencia enerxética xeral, desde o A ao G.

Como se dixo, cómpre que a lavadora posúa ciclos de lavado económico e curtos, ademais da posibilidade de optar por diferentes temperaturas para aforrar enerxía. Outra cuestión importante é que a situación do filtro sexa accesíbel no aparello, para poder mantelo sempre limpo. Tamén, debe valorarse outro aspecto que introduce eficiencia na xestión global deste e o resto dos electrodomésticos: a utilización de materiais reciclados e reciclábeis na súa fabricación.

Respecto ao tipo de carga, hai lavadoras de carga superior. Estas incorporan velocidades máximas de centrifugado inferiores ás convencionais, pero son unha solución para as vivendas que non dispoñen de espazo para instalar unha lavadora maior de 40 centímetros de ancho.

A velocidade de centrifugado pode oscilar entre as 500 revolucións por minuto (rpm) e as 1.300. As máquinas máis modernas integran mecanismos de equilibrado gradual para que as prendas non queden apelmazadas tras o centrifugado. Un centrifugado de alta velocidade escorre mellor a roupa e aforra en tempo á hora de secala.

Por último, se se evita pór en marcha a lavadora simultaneamente con outro electrodoméstico como a cociña ou o lavalouza, aproveitarase mellor a potencia eléctrica contratada e se se dispón de tarifa nocturna aconséllase unha lavadora con temporizador, para así pola en funcionamento cando o prezo da electricidade é máis barato.