Repsol YPF

Os aparellos de ar acondicionado requiren un elevado consumo eléctrico e, empregados excesivamente, poden provocar problemas de saúde como gripes, arrefriados, bronquite e dores de cabeza. Servirnos dunha axeitada distribución de diversas plantas pola vivenda pode ser unha alternativa natural e decorativa para lograr un ambiente de temperatura máis agradable, xa que permiten humedecer o ambiente ao evaporar a auga coa que se as rega, a través dunhas diminutas aberturas que teñen chamadas estomas. 

Se dispomos de xardín 

Unha boa opción é recorrer ás plantas gabeadoras. Unha enredadeira que cubre un muro ademais de realzar o seu aspecto proporciona unha prezada sombra e humidade ao interior deste. Á hora de escoller o tipo de planta o máis recomendable é que sexa de folla caduca, para que en verán poida proporcionar sombra pero en inverno non nos oculte o sol e para que ao deixar visible o muro tras a caída das súas follas non sirva de hábitat para insectos e animais molestos. 

Tamén convén ter en conta outras características variables dunha gabeadora a outra, como se poden soportar os raios solares directamente ou hai que situalas en zonas máis sombreadas, ou a intensidade do vento que poida soprar onde a vaiamos plantar. Os sebes, árbores e arbustos tamén contribúen a crear ese espazo de sombra tan prezado. 

Para o interior do fogar 

As plantas resultan ideais porque ademais reducen a concentración de esporas de mofo, po e bacterias do ar, aumentan a concentración de ións negativos compensando así os campos eléctricos de signo positivo emitidos polos electrodomésticos, en verán humedecen o ambiente e en inverno xeran algo de calor, como calquera outro ser vivo. Situadas xunto ás fiestras poden amortecer os ruídos procedentes do exterior. Por suposto, ademais de todo isto teñen tamén unha importante función decorativa, proporcionando un ambiente máis alegre e sosegado. 

Segundo a temperatura e luminosidade de cada habitación haberá que buscar as especies axeitadas, situándoas lonxe de estufas e radiadores e para facelas máis visibles podemos utilizar cestas colgantes e pedestais, dispoñibles nunha gran variedade de estilos e materiais. Se a luz é abundante podemos recorrer por exemplo a Bromelias, Violeta africana, Alegría da casa, Begonias, Orquídeas, Bromeliáceas...etc. Se a luz é escasa entón especies como Aloe, Sansevieria trifasciata, Cissus antarctica, Esparragueira ou Schefflera actinophylla   resultarán máis axeitadas. 

Desde hai uns anos están poñéndose de moda os bonsáis e os cactos, que proporcionan unha nota de orixinalidade á casa. Por último convén aclarar que, en contra do que a miúdo se pensa, ter plantas no dormitorio non é prexudicial, xa que o seu consumo de osíxeno pola noite é mínimo en comparación co que require outra persoa ou unha mascota. Durante o día ademais compensan sobradamente ese consumo, ademais de xerar as vantaxes anteriormente mencionadas. 

Articles relacionats

- Fiestras que aforran o ar acondicionado