Repsol YPF

Na elección inicial da máquina estriba gran parte dos resultados culinarios e da capacidade de aforro ao cociñar dos seus usuarios. O primeiro que hai que ter en conta é a súa eficiencia enerxética e que as funcións que presenta o forno respondan ás necesidades do usuario. Ben é certo que case todos os novos equipos xa están dotados de grandes melloras en canto a quentamento e a illamento térmico. Non obstante, se o aparello ten xa uns anos talvez sexa proveitoso revisar o selado da súa porta. De entrada, se se ha de comprar un forno é mellor elixilo de gas que eléctrico, porque é máis eficiente. Por outro lado, o microondas é o máis indicado polo seu menor consumo enerxético: substituír o microondas polo forno convencional pode chegar a supoñer un aforro de entre o 60 e o 70% da enerxía e unha gran diminución de tempo de cociñado. Un microondas cunha potencia de 1.200 vatios que permaneza acendido 15 minutos diarios, unhas 10 horas mensuais, non chega a alcanzar un consumo de 13 quilovatios. Bos costumes:  Independentemente dos modelos, nos fornos, ao igual que nas placas, pode aproveitarse a calor residual se se apagan momentos antes de que o prato que se estea cocendo ou asando estea no seu punto. A temperatura restante será capaz de rematar de enfornar o alimento. Convén saber que cociñar á máxima temperatura, ademais de non beneficiar o resultado final do prato, consome moita enerxía, malia que aforre tempo. Polo tanto, é preferíbel diminuír a intensidade unha vez que se alcance o punto máximo de cocción. Outra medida de aforro consiste en deixar de prequentar o forno sempre que a receita non o esixa expresamente. Normalmente, para coccións superiores a unha hora non é preciso prequentamento ningún. Igualmente hai que recordar que o recinto baixa entre 25 e 40 graos a súa temperatura cada vez que se abre a porta, co cal se consome máis enerxía para retornar a temperatura ao nivel marcado polo termóstato. Os novos fornos posúen un bo visor, polo que xa non é necesario abrilos. A maior parte das veces a súa apertura é innecesaria e, como se dixo, con ela pérdese ata un 20% da calor acumulada no interior. É boa idea preparar varios alimentos dunha vez e gardalos no frigorífico ou no conxelador para gastar menor tempo e enerxía, porque en cada arranque consómese moito. Ademais, tamén se poden colocar no forno varios alimentos para que se enfornen á vez. En canto aos recipientes, o vidro mantén a calor con máis facilidade que outros materiais. Se se usan fontes, moldes ou bandexas de vidro para cociñar no forno o proceso será máis curto e poderase diminuír a temperatura do aparello en aproximadamente 25 graos. Dispendio de enerxía:  Pola contra, se se trata de torrar pan é moito máis recomendábel utilizar un torrador en lugar do forno. Nin que dicir ten que nunca debe usarse o forno de cociña como fonte de calor para caldear a casa. En canto ao dispendio de enerxía no caso dos fornos microondas faise palpábel, sobre todo, cando se desconxelan alimentos posto que existen varias maneiras de facelo como sacar o produto do conxelador a noite anterior- sen consumir gas nin electricidade. Manter os aparellos domésticos limpos, entre eles o forno e o microondas, fainos máis duradeiros no tempo e tamén aforra enerxía. Se o forno está sucio e está dotado da función de autolimpado por pirólise (descomposición térmica de residuos), paga a pena utilizar esta opción sempre despois de cada uso, cando o forno aínda se atope quente.