Repsol YPF

A enerxía en espera ou “standby” é o consumo de electricidade dos electrodomésticos que permanecen conectados pero non se están empregando. A miúdo se cree que isto supón un gasto ínfimo, apenas a enerxía que require un pequeno piloto xeralmente vermello (ás veces tamén verde ou azul). Pero non é así. 

Segundo diversos estudos realizados, como o da “International Energy Agency”, o do Fondo Británico de Aforro Enerxético ou o da Escola Técnica Superior de Enxeñería de Bilbao, a suma total do consumo de enerxía en espera dos electrodomésticos presenta bastante variedade en función da clase de aparellos que se dispoñan, pero pode supor ata un 16% do consumo xeral de electricidade dunha vivenda. Para un fogar medio da Unión Europea isto supón unha dilapidación de ata 50 euros ao ano.

Que electrodomésticos consumen máis? 

Este tipo de gasto enerxético varía considerablemente dun tipo de aparellos a outros. Xeralmente aqueles que contan cun mando a distancia teñen un alto consumo, como o televisor, o reprodutor DVD, o decodificador de satélite, o equipo de música ou o ar acondicionado. Isto débese a que deben manter acendido o receptor do mando a distancia, o que require entre 0,2 e 2 vatios. 

O grupo de electrodomésticos que representa un maior consumo de enerxía en espera son os equipos informáticos. Así, o consumo dun ordenador en repouso oscila entre 35 e 76 vatios. As impresoras gastan en espera dous terzos do seu consumo en marcha e outros sistemas como os enrutadores tamén supón un alto gasto xa que debe permanecer conectado continuamente.

Pero outros aparellos tamén presentan un elevado gasto. Por exemplo o 85% da enerxía empregada por un vídeo consúmese sen que o aparello estea en uso, mentres que os lavalouzas empregan só un 20% menos que o seu consumo habitual cando permanecen conectadas pero sen estar funcionando. As secadoras, pola súa parte, poden chegar a empregar ata o 38% do seu consumo na enerxía en espera.

Formas de reducir o gasto 

O consumo de enerxía en espera é, segundo algúns enxeñeiros, frecuentemente máis alto do necesario e sería posible reducilo ata un 75 por cento cun custo relativamente baixo e sen que lle afecte ao seu funcionamento. Algúns países xa tomaron medidas para reducir o consumo dos aparellos en “standby” e existen diversas normativas sobre a etiquetaxe destes produtos para orientar  o consumidor ao respecto.  A tendencia en torno a esta regulación é reducir o consumo da enerxía de espera a só 1 Watt por equipo. Un obxectivo que algúns dos electrodomésticos xa dispoñibles no mercado xa cumpren. Nos Estados Unidos a etiqueta ENERGY STAR® é o indicativo que amosan aqueles electrodomésticos de baixo consumo, aínda que en España tamén resulta familiar por ser o logotipo que habitualmente aparece ao acender un ordenador.

Pero ademais temos ao noso alcance outras maneiras de diminuír ese consumo eléctrico innecesario, tan sinxelas como desconectar o enchufe da televisión, o DVD e outros aparellos cando nos vaiamos de vacacións. Perante a dúbida respecto a aqueles aparellos que non saibamos se están consumindo electricidade, basta con tocar o transformador: se está quente, está gastando. Outra opción é agrupar as tomas de varios aparellos nunha regreta provista de interruptor. Así poderemos desconectar cun só xesto o ordenador e varios dos seus periféricos. Tamén é recomendable non deixar transformadores conectados á rede eléctrica se non se están usando. 

Artigos relacionados

- A domótica e o aforro de enerxía