Repsol YPF

Pois moi sinxelo, recorrendo ao xeo, ao secado ou salgado dos alimentos, ou ben construíndo fresqueiras, zonas escuras que se mantiñan a baixas temperaturas. As primeiras neveiras para uso doméstico apareceron a finais dos anos 20 do século pasado. En principio tiñan un só compartimento, para a refrixeración ou a conxelación. As neveiras con dous compartimentos foron introducidas pola compañía General Electric no ano 1939. 

Este electrodoméstico conxela ou mantén frescos os alimentos. Para iso a temperatura no seu interior debe ser moi baixa. ¿Como se consegue isto? As neveiras usan un gas refrixerante que se evapora a unha temperatura baixa. Este refrixerante circula por un circuíto cando o motor ou compresor está en marcha (un termóstato indica cando se activa e cando a para) xerando frío. Un ventilador encárgase de repartir este frío por todo o frigorífico. Para manter a temperatura, a armazón está recuberta con algún illante. 

Tipos
Existen varios modelos de neveiras. As máis convencionais son tamén as máis económicas. Poden ser dunha porta ou de dúas. Funcionan cun só motor, polo que se se sobe moito a temperatura do conxelador pódense acabar conxelando os produtos da neveira. 

Os chamados combis contan con dous motores independentes e incorporan un sistema que fai que o xeo se converta en auga e despois evapore, o que mellora a conservación dos produtos perecedoiros. 

Os No Frost evitan o xeo, a mestura de olores, que os alimentos conxelados se peguen entre si e a perda de propiedades dos produtos. 

Hai tamén frigoríficos de tres portas e ecolóxicos, que reducen á metade o uso de gases clorofluorocarbonados ou CFC´s -uns dos principais causantes do burato da capa de ozono- para arrefriar ou conxelar. 

Cabe mencionar tamén as neveiras a gas. Carecen de motor, polo que son absolutamente silenciosas e non inclúen pezas móbiles susceptíbeis de sufrir desgaste mecánico ou rotura. Baséanse no sistema de absorción, que mediante a calor subministrada por un queimador produce o frío necesario para manter os alimentos. 

Organización dos produtos
Para que os alimentos se conserven sans e frescos no frigorífico, é fundamental distribuílos correctamente nos diferentes departamentos e vixiar que a temperatura sexa sempre a axeitada. 

A temperatura non é a mesma en toda a neveira. Naquelas que teñen o conxelador abaixo, o punto máis frío -a 2 graos centígrados- é o situado xusto enriba dos caixóns das froitas e verduras. Por iso, aquí é conveniente situar os alimentos máis perecedoiros, como a carne ou o peixe. 

Os estantes da porta son os puntos menos fríos. Adoitan estar a entre 10-15 graos centígrados e neles colócanse os produtos que non necesitan demasiada refrixeración, como poden ser salsas (botes de maionesa, mostaza, kétchup) ou manteiga. 

Todos os produtos que se aconsellan conservar no frigorífico despois de abertos, os ovos, tortas, embutidos ou sobras deben colocarse no estante do medio (4-5 graos) e no de arriba (8 graos). 

Eficiencia enerxética
A tecnoloxía permitiu reducir moito o consumo eléctrico das neveiras. Na actualidade supón aproximadamente o 25% do total dunha casa. A eficiencia enerxética depende de varios factores, como o motor, o illamento, o deseño ou o refrixerante. 

En Europa hai tres niveis de eficiencia admitidos para as neveiras: A, o máis eficiente, B e C -aos conxeladores correspóndenlles os niveis D, E, F e G-. As A resultan máis caras que as B ou C, pero co tempo acaban saíndo máis económicas. Os estabelecementos de electrodomésticos teñen a obriga de indicar -na etiquetaxe ou cun adhesivo- o nivel de eficiencia enerxética do frigorífico. 

Hai outro distintivo máis novo, Energy+, que se outorga a aquelas neveiras que teñen máis eficiencia que as de nivel A, a pesar de que aínda son poucas as que o levan.