Repsol YPF

Trátase de radiadores móbiles simples, resistentes e fiables que basean o seu funcionamento na combustión por lapa do queimador cilíndrico situado no tronco metálico que se apoia sobre a base do aparello, na que se introduce a botella de gas butano ou propano. O queimador vai conectado á botella por un tubo flexible que discorre polo interior do tronco central. O acendido é automático por piezoeléctrico (o mellor método para non ter que achegar a lapa manualmente ao aparello), con dúas posicións (máximo e mínimo). Unha vez que se activa, propíciase o quentamento da reixa exterior, emitindo calor cara a fóra. A reixa é un excelente protector antivento, necesario para evitar o apagado do queimador en condicións atmosféricas de ventos fortes. A parte superior do aparello vai equipada cun sombreiro reflectinte de aluminio para dirixir a radiación térmica e aproveitar ao máximo a calor na zona indicada. Os materiais do quentapatios acostuman ser o aluminio para o sombreiro reflectinte, o aceiro con verniz anticorrosión para a estrutura, e o aceiro inoxidable para o queimador, aínda que algúns modelos incorporan queimadores de aluminio inxectado. As pinturas empregadas nos acabados son pinturas epoxi (resistentes ao exterior).
Existen formatos de diferentes dimensións e alturas, así como potencias caloríficas variadas en virtude do espazo a quentar. Igualmente, algúns modelos incorporan rodas para facilitar a súa mobilidade. Os quentapatios só se deben utilizar en exteriores ou en locais grandes moi ben ventilados, é dicir, recintos cuxa superficie aberta sexa igual ou superior a un 25% da suma total de paredes ou teitos. 

Seguridade
Hai unha serie de medidas de seguridade imprescindibles para evitar riscos e prexuízos no entorno. As máis importantes son as que se explican a continuación. Non se deben colocar nunca, a menos de dous metros de distancia do aparello, materiais inflamables, como cortinas, persianas, tecidos…Con respecto ás cubertas superiores, como toldos ou carpas, estas han de situarse a unha distancia mínima de 1,5 metros por encima do sombreiro reflectinte. É imprescindible prestar atención aos mobles e obxectos situados nas proximidades da estufa, pois se acada unha temperatura duns 50ºC no seu radio de acción inmediato. Non se debe tocar ningún dispositivo por encima do tubo ou tronco mentres a estufa estea acendida, e incluso se debe esperar un mínimo dunha hora tras o seu apagado. Desaconséllase cubrir o aparello con algunha lona ou tecido mentres estea sendo empregado, e igualmente é inadecuado movelo mentres estea funcionando. Isto só debe facerse cando transcorresen uns 90 minutos desde a súa desconexión. Tampouco convén activalo en condicións de ventos extremos. Para apagar o aparello sempre se pechará a válvula da bombona.

Mantemento e limpeza
En canto ao mantemento, é importante verificar regularmente o estado do tubo flexible de conexión entre o queimador e a bombona. Se está desgastado, o mellor será chamar ao servizo técnico para que o substitúa por un novo. Pódese aproveitar a visita do persoal especializado para a revisión de todos os dispositivos, de forma que se certifique o correcto funcionamento dos mesmos ou en caso contrario efectúense as accións oportunas (amaño de avarías, recambio de pezas...). 
Para limpar o quentapatios durante o seu período de funcionamento, hai que agardar un mínimo de dúas horas, despois de que fose apagado. Pasarase un pano seco por toda a superficie (tubo, base, sombreiro), prestando máis atención á zona situada baixo o sombreiro reflectinte, que pode aloxar algún mosquito, abella ou outros insectos. 
Unha vez concluída a tempada de traballo da estufa, convén extraer a bombona da mesma, e facer unha limpeza a fondo, eliminando os depósitos e residuos que se poidan encontrar arredor do queimador, e desprendendo toda a sucidade e o po dos distintos elementos da estrutura. É mellor non deixar o quentapatios á intemperie, polo que se non hai espazo para o gardar na súa posición orixinal no interior da vivenda, pódese desmontar. Só haberá que empaquetar ben as distintas pezas conservando todos os elementos para a súa posterior instalación (parafusos, arandelas…) na vindeira tempada. 

Artigos relacionados:
-Outono, época de cambios no xardín
-Cuidados de las plantas en invierno