Repsol YPF

Os quentadores a gas empréganse en moitas vivendas, aínda que progresivamente estes aparellos están comezando a substituírse polas caldeiras de gas, que ademais da Auga Quente Sanitaria proporcionan o sistema de calefacción. 

Os quentadores poden ser de funcionamento atmosférico ou estanco. No primeiro, o produtor de calor extrae o ar de combustión do lugar onde se atopa situado, polo que este espazo deberá contar con suficientes entradas de ar e debe ter unhas dimensións mínimas concretas. No modo de funcionamento estanco, o ar de combustión necesario chega desde fóra por medio dun conduto de ar de entrada. Desta forma, o quentador pode colocarse en calquera lugar e actualmente é o máis recomendable. 

Plan Renove de aparellos domésticos de gas 

En moitos fogares españois, os quentadores son antigos e teñen un funcionamento deficiente, algo que se aprecia ao abrir a billa da auga quente. Se a auga tarda moito en quentarse e cando o fai a lapa do piloto (no caso de que o teña) ocasiona un gran ruído, o máis axeitado será chamar ao servizo de mantemento da empresa instaladora para que revise o aparello. Eles informarante sobre a necesidade dunha limpeza exhaustiva do quentador, ou ben da conveniencia de substituílo por outro novo. Os aparellos domésticos de gas, así como os electrodomésticos, teñen un período de duración de 10 a 12 anos, que non se debe alongar por evitar un novo gasto. Ademais da perda de enerxía e da falta de confort doméstico, un quentador en mal estado pode producir situacións de risco que en casos extremos, poden provocar o falecemento dos inquilinos. 

As consellerías de Economía e Consumo dalgunhas comunidades autónomas españolas, a través dos organismos pertinentes, puxeron en marcha os Plans de Renovación de Aparellos Domésticos de Gas, nos que entran os aparellos con máis de dez anos de antigüidade, ou aparellos que presenten problemas de seguridade derivados dunha mala combustión ou de revocos, se teñen unha antigüidade menor. 

Os quentadores de gas están incluídos neste programa, cunha contía de axuda de 125 euros para quentadores estancos e 35 euros para quentadores atmosféricos. A Comunidade Autónoma de Madrid ten en vixencia esta campaña na actualidade e o Goberno Vasco mantívoa durante os últimos catro anos, pero o proxecto finalizou o pasado 31 de decembro de 2007. Se resides na rexión madrileña, podes beneficiarte aínda destas subvencións se tes un quentador de gas antigo. Podes informarte nos teléfonos da D.G. de Industria, Enerxía e Minas: 91 420 65 14 e 91 580 21 47, ou en Repsol: 901 100 125.

Limpeza e mantemento

Por cuestións de seguridade, é imprescindible que os quentadores estean en perfecto estado. Para isto, deberá revisalo anualmente o servizo técnico da empresa fabricante ou da empresa subministradora de gas. Os profesionais comprobarán os termóstatos, o acendido e apagado do queimador, o conduto de evacuación de gases, a combustión, a temperatura da Auga Quente Sanitaria e realizarán a limpeza xeral do aparello. Xunto a estas inspeccións periódicas, podes encargarte da limpeza semanal da tapa e o panel de mandos do aparello. Unicamente terás que pasar un pano humedecido e retirar calquera residuo de po ou sucidade naquelas zonas onde puidesen terse acumulado partículas. 

É aconsellable que vixíes as reixas de ventilación da habitación onde está instalado o quentador. Deben estar limpas, sen restos de po e libres de obstáculos ou elementos que impidan a entrada e saída do ar exterior. Inspecciona regularmente as reixas e non deixes que se acumule sucidade nas mesmas. 

Por último, pecha sempre as chaves do gas en ausencias longas e en caso de olor a gas, abre as fiestras, pecha a chave de entrada de gas e contacta rapidamente coa compañía distribuidora. 

Artigos relacionados

- O lixo convértese en luz: o biogás

- ¿Que son os gasodomésticos?