Repsol YPF

Neste ámbito os moradores dunha casa atópanse ben. Comercios e centros de traballo saben o importante que é para as persoas desenvolverse nun clima confortábel: aumentan as vendas e o rendemento laboral. A todos nos resulta doado recordar lugares nos que estivemos a gusto, e aos que volveriamos, e aqueles nos que sentimos excesivo frío ou calor.

Enerxía e illamento

As condicións meteorolóxicas vólvense adversas cando fan superar sensibelmente os valores mencionados de temperatura e humidade. É entón cando se fai necesario gorecerse dentro de calquera construción. Aínda así, cando os rigores do inverno ou do verán se fan máis patentes, as edificacións necesitan unha grande achega de enerxía para manter unha temperatura agradábel. 

Para que unha estancia conserve unha temperatura determinada precisa que os seus 6 lados estean construídos con materiais illantes ou malos condutores da calor. Na maioría dos edificios os illamentos térmicos son insuficientes, o que obriga a consumir demasiada enerxía para conseguir unha temperatura idónea. 

Revestimentos e materiais de edificación son tema de investigación. Trátase de optimizar a construción para aforrar enerxía. Os expertos aseguran que hoxe en día existen medios para construír edificios que reduzan os consumos enerxéticos á metade do consumo actual. 

Constantes avances froito de investigacións e rigorosos ensaios en combustibles como o gasóleo aseguran o máximo rendemento das caldeiras e reducen os custos de mantemento das instalacións de calefacción.

Sistemas de climatización

No desenvolvemento dos diferentes sistemas de climatización tamén imperan criterios de aforro de enerxía. Polo xeral os sistemas tradicionais de calefacción non tiñan un control preciso da temperatura. Pero os avances tecnolóxicos foron importantes neste sentido. Hoxe os novos equipos proporcionan maiores niveis de confort con menor consumo e mellor calidade. Acredítano os contadores de consumo, que xa non se instalan só por motivos de aforro económico senón tamén por razóns ambientais. 

Novos equipos climatizadores, dende caldeiras combustíbeis a bombas de calor, pasando por unidades exteriores coa posibilidade de interconectar unidades interiores de distinta capacidade e tipo... Hai multitude de equipos que permiten unha climatización personalizada para cada estancia.

As novas xeracións de equipos de alta eficiencia enerxética son moi versátiles. Existen equipos murais, de casete ou condutos, ben en paneis, no teito, no chan ou en forma de columna. Hai novos sistemas capaces de refrixerar ou quentar de forma independente máis dun espazo ao mesmo tempo. Ofrecen un amplo rango de aplicacións para fogares e outros ámbitos como oficinas ou empresas.

Pero a garantía dun clima personalizado en cada estancia é a composición en diversas unidades interiores. Un control zonal permite logo un importante aforro de enerxía. As distintas unidades dispoñen do seu propio mando a distancia, aínda que se poden regular de xeito centralizado ou mesmo integrarse nun sistema de xestión por ordenador.

Estes equipos detectan a temperatura da entrada e saída dun evaporador e a diferenza entre a temperatura ambiente e a desexada. Así calculan a temperatura do cuarto para conseguir sempre unha proporción de eficiencia enerxética (EER) elevada. Pódese controlar con precisión a temperatura de calquera sitio no que se sitúe o emisor térmico e reducir así o gasto enerxético ata un 30%.

Os emisores térmicos máis avanzados incorporan innovadores sistemas que detectan a presenza de persoas. Estes sensores intelixentes aforran de forma automática consumo enerxético cando non hai ninguén nunha estancia. Se se atopa baleira, en función da información que facilita, e dependendo de se é inverno ou verán, redúcese ou elévase a temperatura ambiente cada media hora.

A capacidade de control elévase cun cronotermóstato electrónico dixital diario, mediante o cal se pode elixir a temperatura ideal para cada momento do día e da noite. Grazas a este aparello poden preverse distintas necesidades en cada momento e situación. Cada persoa pode controlar de forma precisa as distintas estancias da súa casa: salón, cociña, baños, dormitorios, etc. Consiste en programar o funcionamento dos equipos segundo o uso que se lle dá aos distintos cuartos durante determinadas horas do día. O usuario pode facer uso de programas configurados de serie ou programar segundo as súas preferencias.

Artigos relacionados:
- Produtos e servizos
- Aforrar enerxía no fogar
- Formas de aforro pasivo de enerxía