Repsol YPF

Agora é máis fácil elixir a temperatura do entorno de maneira persoal, xa que é posíbel empregar aparellos de pequenas dimensións que funcionan tan só con pilas e cubiños de xeo.

Por poucos euros pode comprarse unha mini-consola de ar acondicionado para tela, por exemplo, preto do escritorio. Só hai que enchela con xeo e enchufala. Deste modo pódese reducir o orzamento nas empresas do ar acondicionado sen que ninguén deixe de estar fresco e cómodo. Tamén hai modelos que funcionan con pilas. 

A auga conxelada crea un sistema controlado do clima individual do que calquera se pode beneficiar. Nalgúns casos basta con encher unha botella de auga, conxelala, pola no compartimento previsto para tal fin e darlle ao interruptor para gozar en calquera momento dunha brisa fresca e agradábel.

Estes aparellos empregan soamente auga para producir frío e o seu uso é económico. Son ideais para aqueles lugares nos que se queira empregar ar frío de forma persoal. 

Como funcionan?
O mecanismo destes equipos baséase no comportamento do fluído refrixerante que absorbe o calor, evaporándose ao percorrer o circuíto ata a unidade exterior cando elimina o calor absorbido ao condensarse.

Outros sistemas cárganse durante a noite, cando sempre fai menos calor e precisan menos enerxía para baixar de temperatura. Coa tarifa nocturna ademais é máis económica a enerxía eléctrica para converter a cantidade de auga en xeo que servirá durante o día para proporcionar ar fresco.

En calquera caso, antes de seleccionar un equipo de ar acondicionado téñense que ter en conta as propiedades de cada aparello, a súa vida útil, o consumo de enerxía, o prezo e as necesidades dos usuarios ao que vai destinado. A suma de todo pode facer máis aconsellábel a compra dun sistema ou outro.

A incorporación de filtros electrostáticos, desodorizantes, de po e ácaros para tratamento do ar pode ser unha necesidade nalgúns casos. Os filtros melloran a calidade do ambiente. Tamén, un deshumidificador que controle a humidade axuda a acadar unha sensación de confort óptima. De feito, en ocasións, modificando as condicións de humidade conséguese unha sensación térmica máis baixa sen variar a temperatura do termóstato, o que reduce os consumos.

Por outro lado, os mecanismos electrónicos de regulación e control automático conectan e desconectan o funcionamento.

Modelos convencionais 
Os aparellos que se colocan na ventá son os máis frecuentes e máis elementais. Adáptanse facilmente a calquera edificio pero só climatizan a estancia na que se atopan instalados. Dispoñen na mesma unidade de compresor, ventilador, evaporador, etc. Isto orixina algunhas desvantaxes en estéticas e a nivel sonoro.

Os acondicionadores portátiles apenas precisan instalación, pero como en caso dos aparellos de ventá producen bastante ruído. Outra desvantaxe é que as súas potencias frigoríficas son reducidas.

O aparello split (partido) dispón de dúas unidades: unha interior e outra exterior. No interior quedan o evaporador, o ventilador, o filtro de ar e o dispositivo de control. Na rúa sitúase o compresor e o condensador, de modo que, por norma xeral, o sistema é máis silencioso que os demais equipos. 

Os acondicionadores de parede ou murais son os de maior demanda para o fogar actualmente. Teñen capacidade de funcionar como unha bomba de calor. Precisan a instalación dunha unidade exterior e a prolongación do circuíto de conexión do refrixerante desde a unidade exterior á interior. A posta en marcha da unidade interior é sinxela e non precisa de obra. 

As consolas colócanse normalmente no solo. A súa capacidade de difusión do frío é maior que a dos de parede. Non obstante, necesitan máis espazo para situarse e a súa potencia frigorífica varía.

Os acondicionadores de cassette encáixanse nos falsos teitos de oficinas e comercios. Teñen varías vías de saída de ar frío e só unha de entrada do ar que se ten que refrixerar. Hainos que se fixan ao teito con aspecto semellante ao dos de parede. Para os de condutos fan falta dous canles de comunicación coa habitación onde están colocados: un para a extracción do ar quente e outro para a introdución do ar climatizado. Por último, os sistemas multisplit utilizan unha única unidade exterior acoplada a varias unidades interiores, o que posibilita a climatización de diversas estancias.