Repsol YPF

As placas de cristal temperado trouxeron o deseño ás cociñas de gas e tamén achegaron beneficios no que a limpeza se refire, pois ao ser un material máis liso que a base metalizada, o seu mantemento é moi sinxelo. Basta con pasar un trapo humedecido e quedan perfectas. A aposta deste novo modelo polos fabricantes de cociña é atribuíbel á necesidade de innovar na parcela de cocción a gas, pois a diferenza do que se pensou coa irrupción das vitrocerámicas, as placas de gas mantiveron o seu espazo no mercado, aínda que con menor cota que hai vinte anos. Porén, esta redución da cota converteunas nunha especie resistente fronte ás modas e tendencias cunha importante lexión de incondicionais que prefiren o gas sobre outras alternativas. Boa parte dos chefs considera o gas a enerxía perfecta para dar o punto óptimo ás súas coccións. As razóns que argumentan en defensa de tal afirmación son: o aspecto visual da lapa; a inmediatez na suba ou baixada da mesma, de forma que se adquire maior control sobre as coccións, e a posibilidade de empregar calquera batería de cociña. 

Para público tan fiel, as empresas desenvolven novos modelos e versións das encimeiras tradicionais, e así as actuais ofrecen infinidade de melloras, entre as que salientan: a gran variedade de formatos, o dispositivo de seguridade gasStop, o avisador acústico, a desconexión electrónica de seguridade, a máxima estabilidade das grellas de ferro fundido (poden incorporar amortecedores de caucho para evitar riscaduras na placa), o indicador de calor residual en todas a zonas, a válvula de seguridade para nenos, e a colocación dos botóns ou mandos sobre a superficie da placa, entre outras. 

Características do cristal temperado 
O cristal temperado emprégase en aplicacións onde poida haber riscos por accidentes causados por rotura de cristal, como a construción de edificios e a fabricación de vehículos e electrodomésticos. É un cristal moito máis resistente aos impactos e aos cambios bruscos de temperatura que o cristal convencional, xa que conta cunha capa de compresión maior ou igual a 1.000 psi na súa parte externa e de 9.700 psi na súa parte interna (psi é unha unidade de medida de presión do sistema inglés; as súas siglas corresponden aos termos pound square inch, que en español se traducen por libra por polgada).  

Antes do proceso de temperado, a estes cristais pódenselles facer cortes, perforacións, esmerilacións e, por suposto, tamén se poden laminar. Desta forma lógranse acabados diversos e apropiados aos diferentes usos e necesidades. É moi seguro, xa que se se rompe, o cristal fragméntase en pequenos pedaciños practicamente inofensivos evitando danos e lesións lamentábeis.  

Xeralmente, o cristal temperado acostuma presentar un logotipo de pintura cerámica que garante e certifica o proceso ao que ha estivo sometido, a través do que consegue diferenzas significativas no seu patrón de fragmentación e nos seus niveis de resistencia mecánica e térmica, con respecto a un cristal convencional. 

Arte e deseño nas cociñas de gas
Coa incorporación das placas de cristal temperado, as cociñas de gas do século XXI ofrecen unha imaxe moito máis competitiva, acorde coas tendencias actuais de deseño. Os novos modelos combinan o sistema máis profesional de cocción (a gas) e a innovación, a través destas superficies modernas e resistentes, que habitualmente inclúen todo tipo de sistemas de seguridade e prestacións tecnolóxicas de vangarda. 

Prestixiosas empresas de electrodomésticos especializáronse na fabricación de cociñas “retro”, aparellos de corte antigo, cunha imaxe sorprendente e espectacular, que fascinan ao usuario e se adaptan a calquera fogar, con independencia do estilo decorativo do mesmo. Estas cociñas, que se sitúan na gama máis alta do mercado, acostuman utilizar gas, enerxía económica, ecolóxica e limpa. 

Sen chegar a un rango tan elevado de mercado, algúns fabricantes con placas de cociñas de todas as gamas, elixiron as de gas para presentar modelos artísticos e realmente orixinais. É o que fixo a coñecida firma Balay durante a celebración da Feira Internacional de Arte Contemporánea ARCO, na súa edición do ano 2004. Balay exhibiu unha cociña de gas da man do artista español Mateo Maté, á que se lle modificara un dos seus queimadores dándolle a forma da Península Ibérica. Que tomen nota os deseñadores, os novos talentos e a industria. A imaxinación e a creatividade teñen moito que achegar aínda ás cociñas de gas. 

Artigos relacionados:
> Revisión de gas butano no fogar
> O lixo convértese en luz: o biogás