Repsol YPF

É o Real Decreto 1085/1992 do 11 de setembro que regula a actividade de distribución de Gases Licuados do Petróleo, o que, no seu artigo 22, establece unhas esixencias mínimas de seguridade e as obrigas dos titulares dos contratos deste tipo de fornecemento. Entre elas, atópase a inspección cada cinco anos da instalación por parte de persoal legalmente autorizado para o mantemento das instalacións de butano e propano. Polo tanto, non só é indispensábel revisar a instalación cada cinco anos senón que tamén se debe pedir á empresa encargada que acredite devandita revisión. 

Obrigas básicas
Que ten que facer un usuario para manter a súa instalación de botellas de butano ou propano adecuadamente? As súas obrigas basicamente son:

- Concertar cada cinco anos unha revisión da instalación cunha empresa legalmente habilitada para isto. No caso de butano e propano a revisión é obrigatoria na maioría das comunidades autónomas cada cinco anos; cada catro anos se se trata de gas natural.
- Substituír nos prazos indicados todos aqueles elementos da instalación que teñan data de caducidade.

O usuario pode convir esta inspección do gas con calquera empresa autorizada que el mesmo escolla. As organizacións de consumidores e as autoridades aconsellan non deixar entrar nin contratar servizo ningún con compañías cuxos servizos non fosen requiridos e, no caso de recibir a visita a domicilio, que se comprobe a súa homologación e se pida un orzamento.

Cando se efectúe unha revisión o consumidor ten que pedir o certificado correspondente ao operario, o cal debe emitilo por triplicado: unha copia para a empresa e dúas para o usuario, unha das cales presentará á compañía fornecedora para que poda continuar dándolle servizo.

Antes do prazo marcado, 5 anos se é butano ou propano, ou 4 se é gas natural, non se pode impor unha revisión, agás cando se leven a cabo modificacións nas instalacións. 

Continuando coas pautas para garantir a seguridade, aconséllase aos usuarios:

- Que o tubo flexíbel nunca quede en contacto coa parte traseira do forno da cociña ou pegado a calquera outra fonte de calor. 
- Non tapar nunca as reixas, posto que debe haber sempre ventilación en todas as estancias onde funcione un aparello a gas. 
- Fixarse na chama, xa que a súa cor reflicte a calidade da combustión. Se a combustión é boa a chama ten que ser viva, estábel e azulada. Se ao arder fai ruído, é inestábel e ten os bordes amarelos convirá avisar ao servizo técnico do aparello para que o revise.
- Nunca se debe acender unha chama nin accionar ningún interruptor eléctrico se se nota olor a gas. Nese caso, hai que pechar a espita, ventilar a casa e chamar ao servizo de avarías.

As empresas fornecedoras dispoñen dun servizo de asistencia técnica e un censo de usuarios, no que constan os datos da instalación e os resultados das revisións periódicas. 

O servizo de mantemento oficial de Repsol Butano ofrece a garantía de Repsol Butano, persoal con ampla formación e experiencia, a revisión oficial obrigatoria, un control anual da instalación, atención de avarías 24 horas e unha reparación inmediata, na que se inclúe de maneira gratuíta o servizo se se debe á bombona de Repsol Butano, o cambio do tubo flexíbel ou o regulador se se observa un mal funcionamento, así como o desprazamento dunha persoa especializada e un seguro, entre outras prestacións.

Aparellos móbiles
A normativa esixe unha revisión periódica só para os titulares que consumen gas butano ou propano envasado como fonte de enerxía para unha instalación fixa de gas, non para os envases destinados a alimentar aparellos móbiles como estufas, grellas, paelleiras, etc.

Este tipo de contratos non teñen obrigación de pasar ningunha revisión periódica. Non obstante, é recomendábel, por seguridade, realizar un mantemento preventivo e cambiar as gomas, xuntas e outros elementos con data de caducidade dentro dos prazos marcados.