Repsol YPF

Que é o plástico? 

Como xa sabemos a materia está composta de átomos, que se acostuman agrupar formando moléculas. Cando estas á súa vez se unen forman unhas macromoléculas que se denominan “polímeros”, un termo que provén das palabras gregas poly (moitos) e meros (que significa parte ou segmento).   

Os polímeros poden ser de orixe natural, como por exemplo a celulosa, a cera e o caucho ou ben sintéticos derivados do petróleo e outras substancias, como por exemplo o plástico. O seu nome provén do grego   plastikos , que quere dicir moldeable, e é que a súa principal característica é que a partir dunha temperatura determinada (que varía segundo o tipo de plástico) adquire unhas propiedades de elasticidade e flexibilidade que permiten moldealo con gran facilidade.   

Isto, unido aos seus baixos custos de produción e as súas excelentes características de lixeireza, peso, funcionalidade e capacidade illante convertérono no material tan popular e omnipresente que é hoxe en día na nosa sociedade, xa sexa na roupa, nos envasesde todo tipo de alimentos e produtos de limpeza ou nos aparellos electrónicos.

Orixes e desenvolvemento   

Ao falar dos antecedentes dos modernos plásticos hai que mencionar a figura de John Wesley Wyatt. Trátase dun inventor norteamericano que en 1860 participou nun concurso realizado por unha empresa fabricante de bolas de billar, que ofrecía 10.000 dólares a quen atopase un material co que elaboralas que non fose o tradicional marfil, moi custoso e difícil de obter. Aínda que finalmente non gañou o premio puido patentar o celuloide, que foi adquirindo un crecente uso na fabricación de todo tipo de utensilios e, como esquecelo, chegou a ser o material no que se gravaban as películas.   

Un prometedor futuro 

A vida moderna caracterízase entre outras cousas pola crecente abundancia de aparellos electrónicos que nos rodea e moitos deles, nos últimos anos, teñen na portabilidade o seu maior reclamo. Pero dificilmente poderiamos levar os teléfonos móbiles no peto ou cargar cos cada vez máis delgados ordenadores portátiles se non estivesen fabricados en gran parte con diversas clases de plástico.   

Este emprégase tanto na elaboración das partes internas como as placas dos circuítos integrados, os encapsulados e o cableado, onde pode achegar a súa excelente capacidade illante térmica e eléctrica, como na carcasa do aparello, que lle permite un gran aforro de peso, unha gran resistencia e durabilidade e unha aparencia atractiva grazas á liberdade de deseño que ofrece fronte a outros materiais.   

Artigos relacionados:

- O uso de plásticos na agricultura

- Transmitir electricidade sen cables