Repsol YPF

E é que o mercado de ar acondicionado en España chegou a crecer máis dun 20% durante 2003, debido ás elevadas temperaturas. Desde entón, os segmentos comercial e industrial manteñen un crecemento sostido próximo ao 5%.

Este é o motivo polo cal as vivendas do futuro comezan a tomar en conta a integración de tecnoloxías que incorporan sistemas de automatización e control para refrixerar o ambiente no seu interior. Ademais, as novas normas de construción tratan de aplicar técnicas pasivas para lograr un gasto enerxético menor e fomentan o consumo de enerxías alternativas. 

Por que se constrúen xa os novos edificios con esta instalación ou polo menos coa súa preinstalación? Merece a pena? Evidentemente; o obxectivo non só é elevar os niveis de confort dos moradores das casas de hoxe senón reducir o consumo de recursos que supoñen as remodelacións futuras como consecuencia de non ter contemplado a posibilidade de introducir o ar acondicionado durante a obra.

Aforro de recursos
Respecto á edificación residencial, cada día son máis as promocións de vivendas novas que incorporan a preinstalación de ar acondicionado. É un servizo máis que proporciona valor engadido ás vivendas. Tanto é así que nalgunhas cidades, como o municipio de Madrid, a normativa obriga polo menos á preinstalación dos condutos en caso de edificios novos ou de reforma completa. Logo o promotor ten a posibilidade de ofrecer ao comprador a instalación opcional dos aparellos. Nas cidades máis calorosas ou nalgunhas promocións de alto standing incorpórase en obra a instalación de climatización completa.

Pese a que o acondicionamento ambiental non é unha tarefa fácil, a inserción deste tipo de sistemas está cada día máis ao alcance de todos. De feito a preinstalación do ar acondicionado xa leva tempo incluíndose nos proxectos de edificación.

O mesmo equipo de climatización pode ir dirixido a unha casa ou a un local, a obra nova ou a edificios xa construídos. Os españois adquiren arredor dun millón de equipos de ar acondicionado ao ano. Os fabricantes atribúen esta auxe ao incremento da renda dos cidadáns. Os equipos autónomos, roof-tops e de baixa silueta, entre outros, están dirixidos, entre outros usos, a nova edificación. A gama comercial-residencial comprendería os aparellos cunha potencia de entre 7 e 70 Kw.

Tanto a preinstalación como a instalación do ar acondicionado deben estar dotadas de condutos ben realizados e con espazo suficiente para a maquinaria. Independentemente do aspecto puramente normativo, calquera tipo de instalación para o confort interior da vivenda é moi importante no momento da súa realización, de maneira que se poidan evitar futuras reformas co conseguinte gasto e xeración de residuos. 

Entre as técnicas pasivas de aforro de enerxía salienta o illamento das construcións. Os cidadáns pódense aforrar un 25% da súa factura en ar acondicionado se se incrementa en 7 centímetros o espesor de illamento nas vivendas novas. Trátase de incrementar a capacidade de aforro de enerxía das vivendas actuais. Así, os edificios comezan a ofrecer o máximo potencial de aforro de enerxía e CO2.

Ar acondicionado e medio ambiente
Desde que en 1902 o enxeñeiro estadounidense Alfred Wolf instalase o primeiro aparello moderno de ar acondicionado, este invento fíxose indispensábel para combater os rigores da calor. A posibilidade de instalar ar acondicionado central abriuse, a mediados dos 50 e tamén en Estados Unidos, como unha fórmula para abaratar custos de construción, sobre todo porque se rebaixaron os teitos. 

Porén, o uso do ar acondicionado implica un forte impacto negativo sobre o medio ambiente. Esta é a causa pola que os científicos se afanan en conseguir líquidos refrixerantes menos contaminantes e pola que se utilizan novas técnicas para climatizar edificios. Recentemente, Barcelona inaugurou a primeira planta de España que aproveita o vapor que se produce na incineración do lixo urbano para este cometido. Por outro lado, a aplicación da domótica ás novas construcións permitirá un importante aforro no consumo enerxético.