Repsol YPF

O seu obxectivo: concienciar á sociedade acerca da necesidade de apoiar a loita contra o quentamento do planeta. Centenares de persoas, empresas, administracións públicas e outras entidades de todo o mundo forman parte deste Club de Kioto. Ser posuidor do carné que o acredita significa que como cidadán, a título individual, se adquiriu voluntariamente un compromiso. Trátase de comprometerse con pequenas iniciativas reais relacionadas coa redución do consumo de enerxía, de implicar a todos na adopción de hábitos e costumes respectuosos co medio ambiente na vida diaria. 

Os científicos levan anos advertindo sobre a elevación da temperatura no planeta e as súas consecuencias. A emisión de gases de efecto invernadoiro ten efectos visíbeis como o desxeo dos glaciares, a perda de biodiversidade, o aumento de enfermidades e o risco de sufrir inundacións, secas e outros fenómenos meteorolóxicos adversos. Por este motivo redactouse o Protocolo da Convención Marco das Nacións Unidas sobre o Cambio Climático que se subscribiu na cidade xaponesa de Kioto o 11 de decembro de 1997. 

Cómo conseguir o carné
O 16 de febreiro de 2005 entrou en vigor o Protocolo de Kioto, ao que se adheriu España no ano 1998. O acordo establece medidas encamiñadas á redución de emisións de gases de efecto invernadoiro por parte dos países industrializados. 

Pero a Fundación Biodiversidade pensa que, ademais, é preciso un compromiso persoal real. Cada cidadán debe apoiar o Protocolo de Kioto e, polo tanto, merecerse o carné tras un cambio de hábitos ou comportamentos cotiás. 

Compromisos como apagar o televisor en lugar de deixalo en stand-by ou utilizar lámpadas de baixo consumo son algúns dos expresados polos membros do Club de Kioto. Para sumarse a el só hai que entrar na páxina web da Fundación Biodiversidade. 

Deste modo, para conseguir o carné do club cada persoa só ten que expresar cál vai ser a súa contribución para atenuar o cambio climático. Cada compromiso é importante. Coa suma do esforzo de todos preténdese conseguir que a Terra sexa un lugar agradábel onde vivir. O internauta só ten que cubrir os seus datos e expor cál vai ser a súa contribución. 

Todas as persoas, entidades, empresas e administracións públicas que manifestaron os seus compromisos respectuosos co medio ambiente á Fundación Biodiversidade recibiron este carné do Club de Kioto.

Compromisos que se poden adquirir
Entre quen contan co carné de Kioto hai nenos e maiores que demostraron ter conciencia ambiental. Ademais, o Club conta con cidadáns e empresas de diferentes países.

E para quen carezan de ideas, na propia páxina de Internet apúntanse algunhas como as que se relacionan a continuación: 

- Apagar o piloto vermello da televisión cando se vaia a deixar de vela. 
- Apagar as luces ao saír de cada habitación.
- Utilizar o ar acondicionado e a calefacción de forma moderada.
- Utilizar a lavadora e o lavalouzas cando estean realmente cheos.
- Aproveitar as tarifas nocturnas para pór la lavadora e o lavalouzas.
- Utilizar a secadora só cando sexa imprescindíbel. 
- Substituír as lámpadas por outras de baixo consumo.
- Quecer só a auga necesaria.
- Tapar as potas para aforrar enerxía. 
- Desconxelar o frigorífico de vez en cando para eliminar o xeo, que crea un illamento que implica maior consumo eléctrico. 
- Utilizar o transporte público, a bicicleta ou camiñar para aforrar petróleo.
- Apagar o ordenador mentres non se utilice.

Artigos relacionados:
> Consumo racional e mellora ambiental
> ¿Como podemos contribuír a salvar a capa de ozono?