Repsol YPF

O autogás é unha mestura especial para automoción de Gas Licuado do Petróleo (GLP). A combinación componse de butano (C4H10) e propano (C3H8) e está definida a nivel europeo pola norma UNE EN 589. O contido mínimo de propano ten que ser un 20% e o contido máximo de butano dun 80%. A repostaxe pódese efectuar en estacións de servizo preparadas para fornecer a vehículos con autogás. 

Este combustible extráese como parte do refino do petróleo ou a partir de xacementos de gas natural. O seu estado a temperatura ambiente e a presión atmosférica 1 é gasoso. Para obter líquido a presión atmosférica a temperatura do butano debe ser inferior a -0,5° C e a do propano a -42,2° C. En cambio, para obter líquido a temperatura ambiente, débese someter ao autogás a presión, a cal é de aproximadamente 2 atmosferas. A súa dispoñibilidade, xa que a súa tecnoloxía de almacenamento, distribución e consumo está plenamente desenvolvida, é inmediata.

Vantaxes
Se se compara o autogás co diesel as súas emisións de óxidos de nitróxeno (NOx) son inferiores nun 90% e as de partículas nun 97,5%. Outra das vantaxes deste combustible son as baixas emisións de CO2 -considerado o principal culpable do efecto invernadoiro que provoca o quentamento da atmosfera-, e a redución á metade no nivel de ruídos respecto aos motores diesel. Un vehículo alimentado con autogás obtén practicamente os mesmos rendementos e potencias que con gasolina, todo isto a un prezo moito máis baixo.

Estes son algúns dos motivos polos que os taxis de Madrid, entre outros colectivos, tamén queren impulsar o uso deste carburante, como enerxía máis limpa e eficiente. O seu consumo contribúe á sustentabilidade na medida que axuda a mellorar a calidade do ar da cidade. Ás vantaxes ambientais e de diversificación enerxética engádeselle o aforro económico que implica o seu uso. 

Segundo a Asociación de Operadores de Gases Licuados do Petróleo, a maioría dos países do noso entorno apostan polo autogás. A xeneralización deste combustible no transporte público favorece o cumprimento das directivas sobre a calidade do ar da Unión Europea. Ademais, se se estende suficientemente, farase realidade o empeño da Comisión Europea para o ano 2020 do que o GLP de automoción represente o 5% do total da enerxía consumida no sector do transporte en Europa.

Vehículos bi-fuel
Pode funcionar con autogás calquera vehículo dotado de motor de explosión de acendido por chispa (motores de gasolina, non diesel.) Os chamados vehículos bi-fuel son capaces de utilizar indistintamente este GLP como carburante ou gasolina, cunha total seguridade.

Para que un vehículo poida consumir autogás ten que dispor dun equipo específico de almacenamento e alimentación, que está formado principalmente por un depósito para o gas en estado líquido, un evaporizador, unha rede de tubaxes, un dispositivo de inxección e unha unidade electrónica de control. Algúns fabricantes de automóbiles comercializan vehículos bi-fuel de serie aos que non é preciso realizar ningunha transformación.

O condutor decide que combustible vai empregar simplemente accionando un botón, sen necesidade de que o vehículo estea parado e sen que se note ningún cambio na condución. Se un dos combustibles se esgota, o motor pasa automaticamente a alimentarse co outro.

Hai outros moitos vehículos, como as carretillas elevadoras, que poden funcionar cunha subministración de GLP. Este tipo de máquinas teñen un menor custo, maior vida, aliméntanse dun combustible máis barato, teñen menos gastos de mantemento, repoñen en menos tempo e gozan de maior autonomía que as eléctricas. Fronte ás carretillas de gasóleo, ademais de todo o anterior, as de autogás son menos contaminantes e máis silenciosas.

Por todo isto, pode concluírse que o uso de autogás como carburante permite importantes aforros económicos e ambientais.

Artigos relacionados:

- Os coches reducen as súas emisións

- Reciclaxe de baterías de automóbil