Repsol YPF

Nas festas de Nadal abondan os regalos, as comidas copiosas, o confeti, as botellas de licores e bebidas espirituosas. Pero gran parte diso convértese en lixo ao cabo duns poucos días. Empregar con sentido común o trío de erres axudará a minimizar a produción de residuos e a xestionalos de forma eficiente. Para conseguilo, o mellor é consumir o necesario, pero só o necesario, e logo depositar no contedor axeitado todo o que se poida reciclar.

Vexetación de Nadal

Nestas datas empréganse abetos naturais como árbores de Nadal. Estímase que a produción anual en España de abetos e piceas para este fin supera con creces o millón de exemplares. Tamén é costume alfombrar o tradicional nacemento con musgo e o acivro convértese no elemento ornamental máis prezado. Estes hábitos poden ser positivos ou negativos respecto ao ambiente, segundo se ao final das festas se continúa cos cultivos destes elementos vexetais ou se acaban no contedor. 

Os concellos acostuman encargarse de recoller as árbores para a súa posterior replantación. Para que arraiguen sen problemas é recomendable compralas con bloques de terra arredor das raíces, emprazalas lonxe das fontes de calor e procurar que as súas raíces manteñan certa humidade. É preferible empregar árbores artificiais se non se seguen estes consellos. De todas formas, as árbores naturais que non poden seguir vivas normalmente recíclanse e son reutilizadas como compostaxe. Entre un 40 e un 70% do lixo doméstico é material orgánico reciclable.

En canto ao musgo e o acivro, ambos están protexidos e a súa recolección está prohibida en moitas comunidades autónomas. Polo tanto, é mellor non os empregar como elementos decorativos.

Menor impacto

Xa que formamos parte do 20% da poboación mundial que consume a riqueza e é responsable do 75% da contaminación, unha forma de reducir o impacto ambiental e os residuos é comprar, por exemplo, as bebidas en botellas de vidro retornables. Outra, rebaixar ao máximo os regalos. En todo caso, os obxectos duradeiros e reciclables, como os de cristal, cerámica ou tela son máis ecolóxicos. O consumidor preocupado polo ambiente ha de preferilos, por lóxica, a outros. 

Por razóns conservacionistas, moitos compradores tamén preferirán artigos de comercio xusto –que proveñen de explotacións sustentables- e xoguetes con pilas recargables. Sen excepcións, tamén é máis barato e ecolóxico reducir o uso de luces nas casas. Poden substituírse as lámpadas ornamentais incandescentes por outras de baixo consumo enerxético.

Estas medidas, entre outras moitas, aforran diñeiro, materiais, enerxía e emisións de efecto invernadoiro. Se os xoguetes novos relegan os vellos, en lugar de tiralos pódense doar a asociacións de caridade, por pór outro exemplo. Non abusar das bolsas de plástico e de envoltorios inútiles ao facer as compras, así como reutilizalos contribúe a reducir o gasto e contamina menos o entorno natural. 

En resumo, canto menos se consuma e máis se reutilice e se recicle, en Nadal e en todo o ano, menos lixo se xerará e menos produtos novos será necesario consumir. 

Estes días préstanse especialmente para inculcarlles aos máis cativos nocións que lles fagan ser máis sensibles perante o impacto que todos lle causamos ao ambiente. Unicamente hai que explicarlles a importancia que ten tratar de non xerar desperdicios innecesarios. 

Artigos relacionados:

- Reciclaxe de baterías de automóbil

- Como obter enerxía do lixo