Repsol YPF

O aproveitamento da forza das ondas como fonte de enerxía é unha técnica moi pouco desenvolvida na actualidade. A Unión Europea puxo en marcha en 2000 a rede temática WaveNet, que se encarga de publicar o estado das investigacións neste campo e o futuro desta fonte de enerxía como alternativa ecolóxica ás fontes orgánicas.

A rede WaveNet está formada por académicos, industrias e centros de investigación de nove países da Unión: Suecia, Grecia, Francia, Reino Unido, Dinamarca, Irlanda,
Holanda, Portugal e Italia.

En Europa, as augas mariñas susceptíbeis de producir máis enerxía son as da zona norte, o océano Atlántico, o mar do Norte e as augas que bañan os países escandinavos.

Hai varias técnicas, aínda que aínda se descoñece cal é a máis rendíbel. Pódese obter enerxía a través das mareas. O movemento de ascenso e descenso das augas do mar produce unha enerxía que se transforma en electricidade nas centrais mareomotoras.
O sistema consiste en aprisionar a auga no momento da marea alta e liberala, obrigándoa a pasar polas turbinas durante o movemento de baixada.

A primeira patente de obtención de enerxía das ondas produciuse en Francia en 1799, aínda que non se desenvolveron proxectos sólidos ata a década dos anos setenta.

Proxecto en España
En España, un grupo de investigadores do Centro de Deseño de Equipos Industriais da Universidade Politécnica de Cataluña liderados polo inventor José Antonio Montañés, ideou
un sistema sinxelo que produce enerxía renovábel a partir da ondada do mar. Os seus creadores afirman que as súas emisións de CO2 son nulas e o seu impacto ambiental, mínimo.

Trátase de aproveitar a forza de flotabilidade e o desprazamento dunha boia. O mesmo cable que fixa a boia no fondo mariño enrólase no mecanismo instalado na parte superior. Entón, transmite a forza e o movemento a un compresor de aire, a unha bomba de auga ou a un xerador eléctrico.

Proxectos actuais noutros países
En Escocia, o seu Goberno asegura que se se aproveitasen ben as mareas se podería producir electricidade abonda para o consumo de 15 millóns de habitantes. Alí está
a primeira turbina europea que traballa co movemento das ondas e que, actualmente, xera enerxía para 400 casas.

En Brasil, o Goberno e a Universidade Federal de Río de Xaneiro aliáronse coa compañía Eletrobrás para desenvolver a primeira planta de xeración eléctrica de Latinoamérica, a partir da enerxía das ondas. A instalación terá unha potencia de
500 quilowatts e funcionará en 2006.

En Estados Unidos a compañía Natural Resources (INRI) probou con éxito o seu novo sistema de aproveitamento da enerxía das ondas bautizado como "Seadog" e capaz de funcionar mesmo con ondada de pouca altura.

¿Sabías que?
-Dende 1581 ata 1822, funcionou en Londres sobre o río Támesis unha grande roda movida pola marea, que permitía bombear a auga ata o centro da cidade.
-Ao redor de 30 vivendas do norte de Noruega dispoñen de electricidade grazas a unha planta submarina que aproveita a forza das mareas. Está situada na canle de Kvalsund, preto da cidade de Hammerfest, un lugar onde se producen diferenzas de máis de 10 de metros entre a preamar e a baixamar.
-As ondas mariñas fórmanse unicamente en puntos determinados do noso planeta e dende eles propáganse de forma radial. A área das illas Azores é unha das máis importantes.
-Calculouse que unha onda de 7,50 metros de altura sobre o nivel das augas tranquilas e de 1,50 metros de lonxitude de onda, propagándose cunha velocidade de 15 metros por segundo, desenvolve unha potencia de 700 cabalos de vapor por metro lineal de crista. Segundo estes datos, unha onda das mesmas características que tivese 1 quilómetro de ancho desenvolvería unha potencia de 700.000 cabalos de vapor. Isto explica os desastrosos efectos que producen as tempestades mariñas.