Repsol YPF

A enerxía proporciona benestar e desenvolvemento económico. Non obstante, é preciso rebaixar as emisións, e o aforro enerxético é un dos obxectivos. Ademais, acadalo non ten por que afectar negativamente ao confort nin ás actividades cotiás, só hai que definir en cada fogar estratexias de aforro individuais. E non é difícil conseguilo. Pero, para pasar da teoría á práctica con bos resultados, primeiro temos que coñecer algúns aspectos. 

Aspectos básicos

En primeiro lugar, a eficiencia enerxética consiste nunha redución do consumo enerxético pero mantendo os mesmos servizos. É dicir, tal e como se apuntou, sen diminuír o noso confort nin a calidade de vida. 

Os edificios consumen preto do 40% da enerxía, e o seu aforro potencial supera o 20%. Por isto, vivir nunha casa capaz de aforrar enerxía de forma pasiva é clave á hora de intentar rebaixar o consumo. O óptimo rendemento das instalacións térmicas e a eficiencia da iluminación son dous apartados determinantes. Mecanismos de regulación e control de temperatura, sensores de detección de presenza ou sistemas de temporización son dispositivos que te axudarán a asegurar a súa eficiencia. Tampouco debes esquecer a inspección periódica do circuíto da calefacción e a caldeira. Podes aforrar ata un 20% cun bo mantemento da instalación. A temperatura idónea para non pasar frío é de 20º C e por cada grao de máis gastarás ata un 5% máis de enerxía.

As persianas evitan perdas, o mesmo que as fiestras de dobre ou triplo acristalamento. Polo día é mellor telas subidas para aproveitar ao máximo a calor do sol. Ten en conta que, se pintas as habitacións de cores claras, ao ser máis luminosas, precisarán menos luz artificial. Os tubos fluorescentes consumen unha cuarta parte en relación coas lámpadas incandescentes e teñen unha duración maior, ben é certo que ao acendelos gastan máis que outro tipo de lámpada. Por iso, é mellor que os deixes acendidos se non vas abandonar o cuarto durante máis de vinte minutos. Por outro lado, só debes colocar lámpadas de gran potencia onde precises unha luz puntual sobre algún obxecto. As lámpadas de baixo consumo gastan entre un 60 e un 80% menos que as halóxenas.

Suma de pequenos detalles

Unha vez resoltas as prioridades do fogar en canto á eficiencia enerxética, debes prestar atención aos pequenos detalles. A suma de todos eles supón un gran aforro enerxético. Así, por exemplo, en inverno, é suficiente con ventilar a vivenda durante dez minutos. 

O frigorífico é o electrodoméstico que máis consume. Se é o momento de adquirir un novo, ao igual que no resto dos aparellos, aconsellámoste que compres un modelo que leve a etiqueta enerxética A, que son os que mellor aproveitan a enerxía. Outra sinxela recomendación é deixar arrefriar os alimentos antes de introducilos no conxelador, así como abrir a porta o menos posible. O carazo nunca debe superar o medio centímetro.

Outro dos aparellos que máis enerxía consume é o ferro. Por isto, cando vaias pasar o ferro é conveniente pasarllo a maior cantidade de roupa posible. O televisor tamén consume moito. Procura que permaneza apagado cando ninguén o vexa, e mellor apagado completamente, igual que calquera outro aparello eléctrico, e non no modo de espera se vai estar sen se acender durante varias horas.

A maneira máis eficiente de empregar a lavadora é programándoa á menor temperatura posible, posto que o 90% da enerxía que gasta destínase a quentar a auga. Nin que dicir ten que é moito máis eficiente enchela de roupa ao máximo da súa capacidade. En canto ao centrifugado, o de alta velocidade é más eficaz, reduce o tempo de secado e practicamente consume o mesmo.

Artigos relacionados:

-Que se fai co lixo unha vez separado?

-Plásticos biodegradábeis