Repsol YPF

 
Estas son algunhas das vantaxes que ofrece a domótica, que podería definirse como un conxunto de servizos da vivenda garantido por sistemas que realizan varias funcións, os cales poden estar conectados entre si e a redes interiores e exteriores de comunicación. Un enunciado que engloba o que se está dando a coñecer como vivendas intelixentes. Casas que permiten ao inquilino realizar accións cotiás con maior comodidade.
 
Unha persoa que viva nunha casa intelixente pode levantarse pola mañá e atopar unhas torradas acabadas de facer e café quente, todo iso previamente programado no ordenador da vivenda. Despois pode saír tranquilamente á rúa sen preocuparse de se pechou ou non a porta, posto que o apartamento se encarga de facelo, ademais de abrir as ventás para ventilar o seu ambiente.
 
Un sistema domótico tamén regula a temperatura dos diversos espazos da casa; controla a iluminación mediante a regulación das persianas, das lámpadas ou dos tubos fluorescentes; controla o sistema de rego de plantas e xardíns captando a humidade do terreo; detecta inundacións cortando a subministración de auga automaticamente, así como a presenza de fume e de intrusos.
 
Todo isto hai uns anos parecería sacado dunha novela ou dunha película de ciencia-ficción. Pero na actualidade adaptar un piso á arquitectura domótica non resulta demasiado complicado, aínda que si caro. Tan só é necesario contar con electricidade e cos complementos precisos para o correcto funcionamento de todos os compoñentes (un sistema informático).
 
Un exemplo
O primeiro fogar intelixente de España foi presentado en Madrid polo grupo inmobiliario Vallehermoso no ano 2001 e deu algunhas pistas sobre as prestacións deste tipo de casas. Esta vivenda deseñouse e situouse nun ámbito real.
 
No salón desta casa un único mando a distancia permite controlar a televisión, o equipo de música ou a intensidade das luces, mentres que na cociña os electrodomésticos se poden acender ou pagar dende calquera recuncho da vivenda.
 
No baño, as luces acéndense cando detectan a presenza dunha persoa e apáganse cando se vai. Ademais, en función da estación do ano ou da temperatura ambiente actívase a calefacción cando se utiliza a ducha, ou o aire acondicionado se a temperatura exterior é alta.
 
Así mesmo, as luces do xardín poden programarse para que se acendan ou se apaguen a unha hora determinada, o mesmo que o sistema de rego. A piscina, pola súa banda, dispón de control de filtros.
 
Vantaxes e inconvenientes
As vivendas intelixentes reportan unha longa lista de vantaxes, especialmente ás persoas que padecen algunha minusvalía, xa que contan con dispositivos especialmente deseñados para invidentes, como sistemas de voz dixitalizada; deficientes mentais como programas de aprendizaxe, ou minusválidos visuais, como teléfonos de texto ou convertedores de texto en voz.
 
Dende o punto de vista do aforro de enerxía, supón outra vantaxe. A tecnoloxía domótica integra na vivenda temporizadores, termóstatos e un grande número de reloxos programados que, ademais de gastar o imprescindíbel, aproveitan as tarifas nocturnas, as cales resultan máis baratas.
 
A seguridade tamén é un aspecto que hai que ter en conta. A domótica detecta incendios, fugas de gas ou escapes de auga. Ademais, mediante un sistema de cámaras sen fíos repartidas por toda a casa pódese ver o que sucede no seu interior dende calquera parte do mundo vía Internet ou dende o propio edificio.
 
Entre os inconvenientes, o prezo é o principal obstáculo para que a domótica se integre nos fogares. A falta de estandarización é outro problema, xa que non existe aínda un protocolo de comunicación universal para os sistemas de control de instalacións.