Repsol YPF

A tecnoloxía aplicada á vivenda, isto é, a domótica, ofrece pouco a pouco posibilidades máis interesantes, cómodas e económicas. Unha delas é a aspiración centralizada, un sistema capaz de recoller o po da casa mesturado co ar e transportalo a través dun sistema de tubos ata un depósito moio maior que o de calquera aspiradora tradicional. Como funciona polo tanto este sistema? Que vantaxes lles reporta aos seus usuarios? É moi custosa a súa instalación?. Aí van as respostas.

Que é a aspiración centralizada?

A aspiración centralizada consiste en colocar unha pequena central de aspiración nun punto da casa e unila ás tomas de aspiración que estarán repartidas polas diferentes estancias da vivenda. Así, o usuario só ten que conectar unha mangueira flexible e pouco pesada ás tomas da casa, e apertar o interruptor da mesma. Será entón cando o po, mesturado co ar, circule a través dos tubos repartido por paredes, falsos teitos ou chans, ata a central de aspiración. A sucidade quedará almacenada nun depósito, bastante maior que o dunha bolsa de aspiradora tradicional, ata que sexa baleirado. 

Algunhas centrais de aspiración contan coa posibilidade de descarga automática, é dicir, está conectada cos desaugues da casa, e unha vez que remates de aspirar, eliminará automaticamente a sucidade acumulada durante a aspiración.

Vantaxes fronte ao aspirador tradicional

Un dos beneficios máis interesantes do sistema centralizado de aspiración é a calidade da limpeza; todo o po que recolle é levado á unidade central e expulsado, mentres que cos electrodomésticos tradicionais, se perde parte do aspirado debido ao ar de escape; ata un 30 por cento das partículas de po volve de novo ao ambiente.

Ademais, as centrais de aspiración son ata tres veces máis potentes que unha aspiradora convencional de calidade, o que che permitirá limpar máis en menos tempo, e beneficiará a túa saúde, xa que elimina completamente os alérxenos, tales como ácaros.

Outra das súas vantaxes é a comodidade. Mentres que co aspirador tradicional había que desprazar dun lado a outro da casa o pesado aparello e sistema de cables, coa aspiración centralizada só trasladarás a mangueira, conectarala á toma correspondente e listo, evitando neste sentido golpear os mobles, zócalos ou paredes.

Por outra parte, o sistema de aspiración centralizada é máis silencioso que a aspiración tradicional. Se ademais, o motor se sitúa no garaxe ou rocho, non se escoitará ningún ruído. 

Instalación do sistema

A instalación dun sistema destas características depende de cada vivenda, aínda que sempre constará dos seguintes elementos: unidade central de aspiración, tubaxes, tomas de aspiración e unha mangueira flexible.

A instalación consiste en colocar a central de aspiración no lugar elixido da casa e distribuír os tubos de aspiración ata cada toma. A rede de canalización, realízase en tubaxe P.V.C. En canto aos tubos é habitual colocalos dentro das paredes, no chan, falsos teitos, armarios encaixados ou dobres tabiques. É importante elixir coidadosamente a situación das tomas de aspiración, para cubrir o total da superficie de cada planta, co mínimo de tomas. 

En canto á central de aspiración, esta pódese colocar en calquera estancia, pero é recomendable facelo en puntos afastados das habitacións habitables; tales como un patio traseiro, garaxe, rocho etc, evitando deste xeito a contaminación acústica ou de estética e espazo.

Artigos relacionados

- O fogar dixital, unha realidade

- A casa do futuro