Repsol YPF

As novas tecnoloxías non deixan de sorprender. Se ben contemplar unha obra de arte no seu estado orixinal non ten parangón, hoxe en día, se non tes posibilidades de achegarte ao museo, podes contemplar a maioría das coleccións das galerías máis importantes de todo o mundo cun só clic. Visita o teu museo preferido a través dun percorrido virtual.

Evitarás longas colas, os rigores do frío esperando para entrar e os problemas de tempo que xorden ás veces porque non é suficiente para visitar todo o que se pretende. O único que se precisa é un ordenador con algún programa de visualización instalado, tales como o Windows Media Player, o Quick Time ou o Real Player. 

Museos con tecnoloxía virtual en España

O portal de Internet do Museo del Prado en España ofrece varias posibilidades para percorrer a galería. Así, unha opción interesante, baixo o epígrafe “15 obras mestras”, permítelle ao visitante contemplar os cadros máis coñecidos do museo, ademais de ofrecer información completa sobre o autor, a época, estilo, situación da obra etc.

Unha das súas novidades máis interesantes e moi recomendable para realizar con nenos é a de “Vídeos en liña”. Nesta pestana, o usuario poderá contemplar diferentes galerías, traballos realizados no museo etc a través dun percorrido virtual. Os visitantes poden interactuar coa obra a través de xogos didácticos e moi divertidos.

O Museo Thyssen-Bornemisza de Madrid permite percorrer máis de sete séculos da Historia da Arte e contemplar Obras Mestras da pintura a través da súa páxina web.  O percorrido do mesmo comeza na segunda planta coas obras máis antigas e remata na planta baixa con obras do século XX.  
 
Outras galerías que ofrecen estas posibilidades son o Museo Guggenheim de Bilbao, o Museo de Arte Contemporáneo de Barcelona (MACBA) ou o acabado de estrear Caixa Forum de Madrid, sen esquecer como non o Museo Reina Sofía de Madrid.
   
Museos en Europa

Sen dúbida un dos museos máis visitados polos turistas que viaxan a Francia é o Museo do Louvre, recinto que resgarda esculturas como a Venus de Milo e a Deusa Atenas, por non falar da Mona Lisa. Se non tes posibilidade de viaxar á capital do amor, non o dubides e visita o seu museo máis internacional a través dun interesante e completo percorrido virtual.  

A páxina web do museo galo ofrece en primeiro lugar a posibilidade de realizar un percorrido a través dos exteriores do museo. Unha vez dentro, a visita virtual divide as súas áreas en: salas das antigüidades orientais, exipcias, grecas e romanas, entre outras. O único inconveniente da web, é que non ten tradución ao español.

Outro dos Museos que tamén se atopa na lista de favoritos dos turistas é a National Gallery de Londres, que conta cunha colección permanente con pinturas da Europa Occidental. No seu portal de Internet este museo ofrece unha ollada ás mellores pinturas que exhibe. 

Outros servizos en rede

As facilidades que ofrecen os sitios web destes museos van máis alá. Así, ademais de ofrecer información exhaustiva e completa destas institucións, así como das súas actividades, exposicións, horarios e programación actualizada, o usuario pode reservar e comprar as súas entradas a través dun formulario que se descarga e envía por medio da url. Por outra parte, poden organizar visitas guiadas, xa sexan para grupos ou de xeito individual a través de enderezos de e-mail ou consultar a dispoñibilidade de espazos en datas concretas. 

Artigos relacionados

- Archive.org, a gran biblioteca de Internet