Repsol YPF

Este termo xorde durante unha “tormenta de ideas” da empresa editorial norteamericana O´Really Media, fundada polo “gurú” Tim O´Really. Os participantes falaron da evolución que estaba experimentando Internet. A partir de aquí a palabra propagouse como a pólvora, dando lugar a unha exitosa conferencia (Web 2.0 Conference) e fóronse sentando as bases dunha nova forma de entender a web onde a prioridade é o usuario. 

Na Web 2.0 as aplicacións tradicionais convertéronse en aplicacións que funcionan a través de Internet enfocadas ao internauta. O que prima é a participación e a comunicación. Para isto ponse nas súas mans unha serie de ferramentas, moi sinxelas, que antes só estaban dispoñibles para persoas con coñecementos técnicos moi avanzados. En consecuencia, agora calquera pode crear unha páxina propia sen ter nin a máis remota idea de programación, dar a súa opinión sobre calquera tema ou compartir contidos con outros internautas. Internet achégase ao usuario e non ao revés, como sucedía antes. 

Blogs, wikis e redes sociais

Son varios os servizos que marcan a transición da Web 1.0 á Web 2.0.  Por un lado están as aplicacións online e, por outro, os sitios que permiten compartir diferentes contidos, como direccións, fotos, vídeos ou noticias. 

O vertixinoso avance das novas tecnoloxías permite que, agora, unha páxina de Internet se poida utilizar como se do ordenador se tratase. Así, as ferramentas web ofimáticas (por exemplo, as de Google Docs) ofrecen a posibilidade de xerar documentos como os de Word ou Excel. Os programas residen en servidores remotos e o usuario non ten que os descargar; unicamente ten que baixarse unha aplicación para poder acceder a eles. 

Desta forma, pódense gardar arquivos (informes de traballo, currículos...) no servidor da compañía que ofrece a ferramenta en lugar de no disco duro do ordenador. Así estarán a salvo de avarías ou erros no equipo ou nun dispositivo móbil que darían ao traste con toda a información, coa vantaxe engadida de que se pode acceder a eles desde calquera lugar.

A outra característica da Web 2.0 é a participación e a posibilidade de compartir contidos. Dentro deste ámbito salientan os wikis, termo hawaiano que identifica aos sitios que poden ser modificados en tempo real por calquera internauta. O wiki por excelencia é a enciclopedia virtual Wikipedia. Neste apartado inclúense tamén as bitácoras ou blogs e os podcast, así como os servizos RSS e a sindicación de contidos.

As comunidades virtuais ou redes sociais tamén marcaron a evolución cara a Web 2.0. As máis exitosas, MySpace (www.myspace.com) e Facebook (www.facebook.com). Son sitios web de interacción social formados por perfís persoais de usuarios. Inclúen redes de amigos, grupos, blogs, fotos, vídeos e música. Ademais, dispoñen dunha rede interna de mensaxería que permite aos membros desa comunidade comunicarse entre eles. 

Outros espazos de carácter social que xa pasaron a formar parte da historia da nova Internet son YouTube (es.youtube.com), no campo do vídeo, e Flickr (www.flickr.com), no da fotografía. Ambos sitios deben a súa popularidade á xeneralización da banda ancha e das videocámaras e cámaras de fotos dixitais, así como á expansión da telefonía móbil e á aparición de terminais multimedia. 

Artigos relacionados:
> Blogs no móbil
> Dalealplay, o YouTube español