Repsol YPF

A partir do 1 de xaneiro de 2008, os arrendadores de vivendas poderán desafiuzar aos inquilinos que deixen de pagar un mes a renda acordada en concepto de aluguer. Para axilizar o desaloxo dos morosos e evitar o colapso nos xulgados, cidades como Madrid e Barcelona disporán de xulgados específicos.

E é que non é estraño que un propietario teña que recorrer á xustiza para botar a un inquilino moroso. Desafiuzar a un arrendatario precisa de media un período de 18 meses e estímase que preto dun 1% dos alugueiros remata en xuízo por falta de pagamento. A esta situación culpáselle en parte á escaseza da oferta e da carestía dos prezos.

Con estas medidas trátase de transmitir seguridade xurídica aos propietarios e satisfaise unha demanda considerada polos donos de casas arrendadas como imprescindible para fomentar o alugueiro. 

Proceso lento
Na maioría dos casos o inquilino moroso non se acostuma presentar á vista nin contestar ao requirimento, polo que as sentenzas case sempre son favorables para o propietario demandante. Aínda así, estes procesos, aparentemente sinxelos, resultan na práctica moi lentos. Por iso o Ministerio de Vivenda está intentando aceleralos coa posta en marcha dun plan que beneficiará a máis dun millón de rapaces e familias que vivan de aluguer. 

O desafiuzamento ou xuízo posesorio hoxe pode solicitarse só en dous supostos segundo a Lei de Axuizamento Civil: a falta de pagamento da renda ou a expiración do prazo do contrato. Para facer máis rápido o proceso de desafiuzamento será necesario modificar esta norma. Así, proporcionarase a posibilidade de celebrar xuízos rápidos para a reclamación de débedas e reducirase de dous meses a un o prazo dispoñible polo inquilino para aboar a débeda desde o requirimento de pago.

Unha das iniciativas do Goberno é a creación de 10 novos xulgados nos municipios con maior saturación. De todos modos, mediante a sentenza dun xuízo verbal por desafiuzamento o propietario pode lograr que o inquilino abandone a vivenda, pero non que lle pague as rendas atrasadas. Para conseguir este propósito, deberá iniciar outro xuízo ordinario.

Deducións fiscais
Para axudar os rapaces a emanciparse será necesario tramitar unha nova lei, concretamente para implantar as deducións fiscais para os inquilinos, outra das accións encamiñadas ao fomento dos alugamentos anunciadas polo Executivo.

Porque os beneficios económicos e as desgravacións fiscais seguen inclinando a balanza cara a compra fronte ao alugamento. O aumento da demanda e a escaseza de vivendas de aluguer propiciaron que nos últimos anos a renda mensual case se igualase á cota das hipotecas. As novas medidas anuncian unha desgravación fiscal para os inquilinos que non superen un tope nos seus ingresos. Inicialmente parecen estar orientadas sobre todo aos mozos e, segundo as voces máis críticas, tamén quedan lonxe dos incentivos económicos e fiscais que se obteñen pola compra. 

A primeira parte do plan está destinada a facilitar a emancipación a través de axudas para o acceso ao aluguer. En primeiro lugar ofrece 210 euros ao mes durante catro anos para persoas de entre 22 e 30 anos ocupadas ou paradas con ingresos máximos de 22.000 euros brutos anuais. Ademais, inclúe o préstamo de 600 euros para a fianza e o custo financeiro dun aval de seis meses.

Entre as medidas que presenta o plan gobernamental tamén as hai dirixidas a incentivar a construción de vivendas de aluguer, como a aplicación dun IVE do 4% ás vivendas de nova construción destinadas ao aluguer de renda básica a 25 anos. Tamén incrementa os beneficios para as sociedades e fondos de investimento inmobiliarios que promovan vivenda protexida en aluguer. 

Artigos relacionados:
- Consellos previos á reforma do fogar
- Comprar un piso sobre plano