Repsol YPF

A rendibilidade da compra dunha casa sobre plano responde a tres cuestións: a entrega das chaves non é inmediata, con prazos de entre un e catro anos; as achegas iniciais dos socios das cooperativas serven en moitos casos para financiar parte das obras, e o compromiso de adquisición realízase sen ver fisicamente o inmóbel (malia as recreacións que poidan proporcionar as maquetas, pisos piloto ou infografías en tres dimensións).

Consellos para a sinatura do contrato
Entre os procedementos máis habituais de compra a través de plano destaca o que se realiza por medio dun contrato de arras, mediante o cal o comprador entregará unha cantidade de diñeiro en concepto de sinal, que debe ser descontada do prezo final da vivenda. Por medio do devandito documento, comprador e vendedor comprométense á entrega das chaves e á formalización da escritura nun prazo determinado de tempo. Hai dous tipos principais de contrato de arras: penitenciarias e confirmatorias.

No contrato de arras penitenciarias, ambas as dúas partes poden retractarse, se ben deben facer fronte ás penalizacións que iso suporía. O comprador comprométese a perder o sinal en caso de que finalmente non desexe adquirir a casa. Por outro lado, o vendedor está obrigado a devolver o dobre da cantidade recibida como sinal se decide non efectuar a venda despois do contrato.

No contrato de arras confirmatorias, non obstante, vendedor e comprador están obrigados a cumprir o acordado unha vez asinado o contrato.

Entre as cautelas que debe adoptar o comprador, ha de incluírse a visita ao Rexistro da Propiedade, para coñecer que a cooperativa ou promotora responsábel das obras é a propietaria do terreo. Tamén convén vixiar o cumprimento contractual da oferta da cooperativa ou promotora, dende a superficie da vivenda ata a calidade dos materiais.

En caso de que se desexe realizar algún cambio sobre o que o arquitecto dispuxera no proxecto de execución para as obras de construción -mellorar a calidade dos materiais ou cambiar a disposición dos cuartos, por exemplo- debe facerse constar no contrato de compravenda, se a cooperativa admite esta posibilidade. Pola contra, o comprador tería que esperar á entrega da vivenda, o que suporía un custo maior na efectuación das modificacións, ao ter que derrubar nalgúns casos o xa construído.

Oportunidade para os investidores
O que para uns é unha ocasión para adquirir unha vivenda cuns prezos inferiores ao mercado, para outros é unha oportunidade extraordinaria para especular. As operacións de revenda deste tipo de propiedades convertéronse nos últimos tempos de desenfreo inmobiliario nun dos investimentos máis rendíbeis do mercado, con altas plusvalías en moi poucos anos.
 
O mecanismo é moi sinxelo, o primeiro paso consiste en atopar unha promoción inmobiliaria solvente e atractiva. Unha vez elixido o inmóbel, o investidor comprométese a realizar un pagamento inicial (o anticipo nunca supera o 20% do prezo acordado inicialmente), así como a contribuír con certas cotas ata a entrega das chaves. Este negocio só é posíbel nos casos nos que o contrato asinado coa cooperativa non inclúa unha cláusula que impida a revenda antes da escritura da vivenda.
Nese momento, o investidor só ten que poñer á venda o seu inmóbel e atopar un comprador disposto a pagar os prezos do mercado.