Repsol YPF

Nos Estatutos da Comunidade de Propietarios establécense as disposicións que acordan os propietarios en materia de convivencia. Estas normas afectan a todas as zonas comúns residenciais, e no caso de que estas sexan amplas e inclúan xardíns, piscinas e espazo infantil para xogos, a xunta de propietarios deberá crear o seu propio código de conduta a partir da lexislación vixente. 

É moi importante que estes lugares sexan seguros, que estean ben protexidos de posibles intromisións alleas, actos vandálicos ou comportamentos que poidan  prexudicar aos veciños. Xunto aos servizos de limpeza e mantemento das áreas comúns residenciais, detéctase un incremento no reforzo da seguridade destas zonas, a través dos sistemas de vixilancia. O aumento da televixilancia nos recintos comunitarios é un dato confirmado polas principais empresas de seguridade europeas. Con estes sistemas de vixilancia, os propietarios pódense aforrar a contratación dun vixilante, e no caso de contar cun, estas cámaras supoñen un gran apoio ao traballo do operario. 

Normativa para as piscinas comunitarias

Hai un gran baleiro legal en todo o relacionado coas zonas comúns residenciais. No caso das piscinas, a lexislación para piscinas de uso público é de carácter autonómico, polo que é cada rexión a que establece as directivas pertinentes. Para informarte acerca dos requisitos de seguridade que debe cumprir a piscina do inmoble no que vives, debes dirixirte á Dirección Xeral de Saúde Pública da Comunidade Autónoma onde se sitúa e informarante en que rango se inscribe a mesma: piscina de uso público ou de uso privado. As disposicións son distintas para unha ou outra, e a inclusión nun ou outro apartado depende das dimensións da piscina e do número de usuarios. 

En xeral, se o edificio non supera as 30 vivendas, a lexislación non esixe a contratación dun socorrista. Por encima dese número de vivendas, hai que valorar as dimensións e a tipoloxía da piscina, que determinarán o número de socorristas esixidos, o servizo dun ATS e as instalacións e prestacións pertinentes. Ademais, os Estatutos da Comunidade de Propietarios deberán contar cun regulamento de uso interno da piscina, que especifique con claridade a normativa que rexe na mesma en canto a condicións hixiénico-sanitarias, entrada de mascotas, nenos e uso correcto das instalacións. 

Aínda que a Lei de Propiedade Horizontal, que regula todo o relacionado coas comunidades de propietarios, non obriga ás mesmas a contratar un seguro de responsabilidade civil, é aconsellable telo cando o recinto dispón de instalacións infantís, piscinas e contornos deportivos. Do contrario, no caso de que ocorra algún accidente ou sinistro imputable á comunidade, será esta a que se deba facer cargo da indemnización oportuna.   

Espazos infantís para xogos

Se nas zonas comúns residenciais, hai un espazo infantil para xogos, é imprescindible que este se sitúe a máis de 30 metros do tráfico rodado e que o seu perímetro se presente valado para unha maior protección dos nenos. Os xogos deberán ser seguros e resistentes, con materiais libres de toxicidade e estruturas carentes de arestas ou elementos punzantes. O pavimento sobre o que se coloquen estas instalacións será mol para amortecer caídas e esvaróns, preferiblemente de materiais sintéticos ou caucho. Estes espazos infantís enmarcaranse en áreas libres de obstáculos para que os nenos circulen sen risco, e incluirán carteis onde se especifique a idade axeitada para o goce dos distintos xogos, así como un contacto ao que acudir en caso de estragos ou de situacións de risco.   

Artigos relacionados

- Os nenos e a electricidade

- Instalar unha alarma no fogar