Repsol YPF

Os pilotos da escudaría italiana dominaron por completo a sesión de clasificación do Grande Premio de Francia e conseguiron as dúas primeiras posicións da grella de cara á carreira do domingo. Räikkönen foi primeiro e Massa segundo, deixando en terceira posición a Fernando Alonso. Trulli sairá dende a cuarta posición e Kovalainen dende a quinta. Hamilton partirá décimo terceiro pola sanción que arrastra do pasado GP de Canadá.

Kimi Räikkönen e Felipe Massa compartirán a primeira liña da grella de saída do Grande Premio de Francia. O finlandés mostrou un rendemento moi superior ao de todos os seus rivais, o que lle serviu para facerse coa pole position. O brasileiro Massa non foi capaz de superar a “Aceman” e terá que conformarse con escoltar ao seu compañeiro na primeira fila da grella.

Lewis Hamilton realizou o terceiro mellor tempo, pero perde dez postos pola penalización recibida no Grande Premio de Canadá tras embestir a Räikkönen. Esta situación beneficiou a Fernando Alonso que sairá en terceira posición tras confirmar o bo rendemento do seu R28 mostrado no primeiro día de competición. O asturiano terá na carreira do domingo unha proba de lume para medir as súas verdadeiras posibilidades de éxito durante o resto da tempada.

O piloto de Toyota Jarno Trulli acompañará na segunda liña da grella á súa ex - compañeiro e amigo Fernando Alonso. O italiano, puxo de manifesto unha vez mais, que é un gran especialista en clasificación, pero é de esperar que o seu rendemento en carreira sexa algo peor. Kovalainen sae en quinto lugar e non debería tardar moitas voltas en superar ao veterano piloto transalpino, xa que o seu McLaren é moi superior ao Toyota de Trulli.

A grella para o Grande Premio de Francia queda conformada:

1. Kimi Räikkönen (Ferrari)

2. Felipe Massa (Ferrari)

3. Fernando Alonso (Renault)

4. Jarno Trulli (Toyota)

5. Heikki Kovalainen (Mclaren-Mercedes)

6. Robert Kubica (BMW Sauber)

7. Mark Webber (Red Bull)

8. David Coulthard (Red Bull)

9. Timo Glock (Toyota)

10. Nelson Piquet Jr. (Renault)

11. Nick Heidfeld (BMW Sauber)