Repsol YPF

Mikko Hirvonen é líder do Rally de Nova Zelandia tralo primeiro día de competición. O piloto de Ford ten algo menos de medio minuto de vantaxe sobre o segundo clasificado, Loeb. Noutra proba, esta diferenza o primeiro día suporía unha gran renda, pero neste rally, no que o primeiro clasificado vese penalizado por ter que abrir pista e limpala de grava miúda, esta primeira posición non supón unha vantaxe tan importante. 

O francés Loeb atópase en segunda posición a pesar de ser o piloto máis rápido do día. O problema co que se atopou o galo foi que non puido tomar a saída da sexta especial cando lle correspondía e atrasouse 3 minutos, polo que foi sancionado con 30 segundos de penalización e caeu ao segundo posto cando era líder. O piloto de Citroën alegou que o seu motor non arrincaba, aínda que non parece desatinado pensar que poida tratarse dunha estratexia para non ter que abrir pista na segunda etapa. 

Mentres, Dani Sordo ocupa a terceira posición a medio minuto do líder Hirvonen. O español de Citroën parece estar sentíndose bastante cómodo en Nova Zelandia, debido a que é un trazado moi técnico que lle vai como anel ao dedo. Ademais o de Torrelavega non debe renunciar a nada, xa que nesta proba as distancias amplíanse e recórtanse cando un menos o espera, así que para el a vitoria aínda pode ser posible. Un pouco máis difícil terao Latvala, quen despois de imporse na primeira especial foi caendo ata finalizar a xornada en cuarta posición por diante de Duval, que substitúe a Galli en Stobart, e de Aava.

29/08/2008