Repsol YPF

- ¿Que son os ADRs?

ADR son as siglas para American Depositary Receipt ou Certificado Americano de Depósito.

Os ADRs son un instrumento financeiro creado para que as accións das compañías estranxeiras se negocien nas bolsas estadounidenses. Estes, quedan baixo custodia dun banco, que para representar eses títulos emite os ADRs. Para o caso de Repsol YPF, un ADR equivale a unha acción.

- ¿En que mercados cotizan as accións de Repsol YPF?

As accións de Repsol YPF cotizan nos seguintes mercados:

• As bolsas españolas: Bolsa de Madrid, Bilbao, Barcelona e Valencia
• O New York Stock Exchange (NYSE) ou Bolsa de Nova York
• A Bolsa de Bos Aires  

A evolución das accións da compañía en cada un destes mercados, así como a súa comparación con outras empresas do sector e con diferentes índices bolsistas, pode ser seguida mediante os gráficos que hai dispoñíbeis en tempo real na Web de Repsol YPF, no apartado de "Información económico-financeira" ao que se pode acceder dende "Información para accionistas e investidores".

- ¿Como pode un accionista coñecer o valor actual do investimento que realizou en accións de Repsol YPF?

Na Web de Repsol YPF os accionistas dispoñen dunha sinxela páxina, no apartado de "Valoración actual do investimento", na que poderá introducir os datos relativos ao seu investimento inicial, para coñecer o seu valor actual.

- ¿Cal é o símbolo das accións de Repsol YPF nos distintos mercados?

O símbolo das accións de Repsol YPF para cada un dos mercados nos que cotiza é o seguinte:

• En Reuters:
  - REP.MC para o Mercado Continuo da Bolsa de Madrid.
  - REP.N para a Bolsa de Nova York (NYSE).
  - REP.BA para a Bolsa de Bos Aires.
• En Bloomberg:
  - REP SM para o Mercado Contínuo da Bolsa de Madrid.
  - REP US para a Bolsa de Nova York (NYSE).
  - REP AR para a Bolsa de Bos Aires.  

- ¿Quen ten dereito a asistir á Xunta Xeral de Accionistas?

Poderán asistir á Xunta Xeral os accionistas que sexan titulares dun mínimo de 150 accións, sempre que as teñan inscritas no correspondente rexistro contábel con cinco días de antelación á súa celebración, e dispoñan da correspondente tarxeta de asistencia, que se expedirá con carácter nominativo polas entidades que legalmente corresponda. As devanditas entidades deberán enviar a Repsol YPF, S.A. antes da data establecida para a celebración da Xunta, a relación das tarxetas que expediran por solicitude dos seus respectivos clientes.

O rexistro das tarxetas de asistencia comezará dúas horas antes da sinalada para a celebración da Xunta.

Os accionistas que non posúan o número mínimo de accións antes sinalado (150), poderán agruparse para os efectos de asistencia, designando un representante, que non necesitará ser accionista.

- ¿Como poden os accionistas solicitar informes ou aclaracións sobre a Orde do Día da Xunta Xeral?

Os accionistas poden solicitar por escrito con anterioridade á reunión da Xunta, ou verbalmente durante esta, os informes ou aclaracións que estimen precisos acerca dos asuntos comprendidos na Orde do Día.

O Consello de Administración está obrigado a proporcionárllelos, salvo nos casos en que, a xuízo do Presidente, a publicidade dos datos prexudique os intereses sociais. Esta excepción non procede cando a solicitude estea apoiada por accionistas que representen, polo menos, a cuarta parte do capital.

- ¿Que documentación relativa á Xunta Xeral pon a disposición dos accionistas antes de que esta teña lugar?

Despois de ser publicado o anuncio de convocatoria da Xunta Xeral, ponse a disposición dos accionistas a seguinte documentación:

• Convocatoria da Xunta Xeral coas propostas de acordos a adoptar e informes do Consello de Administración, se correspondesen, sobre a súa xustificación e oportunidade.
• As Contas Anuais e Consolidadas de Repsol YPF, S.A. e as súas sociedades filiais, así como a proposta de aplicación do resultado de Repsol YPF, S.A. correspondente ao exercicio do que se trate.
• O Informe de Xestión de Repsol YPF, S.A. e o Informe de Xestión consolidado do exercicio.
• Os Informes de Auditoría das Contas Anuais Consolidadas e das Contas Anuais de Repsol YPF, S.A.
• O Informe Anual sobre Goberno Corporativo.
• O Informe de Responsabilidade Corporativa.
• E calquera outro informe cuxa inclusión sexa preceptiva, ou se determine polo Consello de Administración.  

- ¿Onde e como poden obter os accionistas a información previa á Xunta Xeral?

No lugar sinalado para a celebración da Xunta Xeral e o día da súa celebración, existirán a disposición dos accionistas varios puntos de entrega da documentación.

Así mesmo, a páxina Web da Compañía (www.repsolypf.com) recollerá unha copia da documentación referida.

Para completar o dereito de información ao accionista, no anuncio de convocatoria da Xunta consignarase así mesmo un teléfono de información ao accionista.

- ¿Como pode un accionista facerse representar na Xunta Xeral??

Todo accionista que teña dereito de asistencia poderá facerse representar na Xunta Xeral por medio doutra persoa, que non necesitará ser accionista. A representación deberá conferirse por escrito e con carácter especial para cada Xunta.

- ¿Que requisitos deben cumprirse para que a Xunta Xeral sexa constituída validamente?

A Xunta Xeral queda constituída válidamente en primeira convocatoria, cando os accionistas, presentes ou representados, posúan, polo menos, o vinte e cinco por cento do capital subscrito con dereito a voto.

En segunda convocatoria, é válida a constitución da Xunta Xeral calquera que sexa o capital concorrente a esta.

- ¿Cando pode a Xunta Xeral acordar válida a modificación dos Estatutos sociais?

Para que a Xunta Xeral Ordinaria ou Extraordinaria poida acordar validamente calquera modificación en xeral dos Estatutos sociais así como a emisión de obrigas, o aumento ou a diminución do capital e a transformación, fusión, escisión ou disolución da Sociedade, será necesaria, en primeira convocatoria, a concorrencia de accionistas presentes ou representados que posúan, polo menos, o cincuenta por cento do capital subscrito con dereito a voto. En segunda convocatoria será suficiente a concorrencia do vinte e cinco por cento do devandito capital.

Cando concorran accionistas que representen menos do cincuenta por cento do capital subscrito con dereito a voto, os acordos aos que se refire o parágrafo anterior só poderán adoptarse validamente co voto favorábel dos dous terzos do capital presente ou representado na Xunta.

- ¿Quen preside a Xunta Xeral de Accionistas?

A Xunta Xeral é presidida polo Presidente do Consello de Administración, a falta deste, por un Vicepresidente e, en defecto de todos, polo accionista que en cada caso elixan os socios asistentes á reunión.
O Presidente estará asistido por un Secretario, que será o do Consello de Administración, no seu defecto, actuará o vicesecretario do Consello de Administración e, a falta deste, a persoa que designe a propia Xunta.

- ¿Poden os accionistas intervir ao longo da Xunta Xeral de Accionistas?

O Presidente antes de comezar co seu informe sobre o exercicio e as propostas que se someten á Xunta Xeral, e para facilitar o desenvolvemento do acto, solicita aos accionistas que queiran facer uso da palabra, que se dirixan aos auxiliares da Mesa exhibindo a súa tarxeta de asistencia para organizar as quendas de intervención.

Finalizada a exposición do Presidente sobre os aspectos máis relevantes do exercicio, este concede a palabra aos señores accionistas que o solicitaran, dirixindo e mantendo o debate dentro dos límites da Orde do Día, salvo o disposto nos artigos 131 e 134 do Texto Refundido da Lei de Sociedades Anónimas. O Presidente porá fin ao debate cando o asunto quede, ao seu xuízo, suficientemente debatido

- ¿Como son alcanzados os acordos na Xunta Xeral de Accionistas?

Os acordos hanse de adoptar co voto favorábel da maioría de capital con dereito a voto, presente e representado na Xunta, coas excepcións previstas na Lei e nos Estatutos.

O número máximo de votos que pode emitir na Xunta Xeral de Accionistas un mesmo accionista ou as sociedades pertencentes a un mesmo Grupo, será do 10% do total do capital social con dereito a voto.

Para estes efectos enténdese que se integran no mesmo Grupo as entidades que se atopan controladas por outra, na situación definida no artigo 4º da vixente Lei do Mercado de Valores do 28 de xullo de 1988. Esta limitación de voto non impide que a totalidade das accións concorrentes á Xunta se computen para a determinación do quórum de asistencia.

Non será necesaria votación individualizada cando por aclamación ou man alzada resulte notorio o sentido da votación e con iso se facilite a boa marcha do acto da Xunta. Iso non impedirá que se faga constar o voto contrario dos accionistas que así o soliciten para os efectos de impugnación ou por calquera causa.