Repsol YPF

Como comprar accións de Repsol YPF

A forma máis directa para comprar accións de Repsol YPF no mercado continuo, é acceder á Bolsa a través dos chamados membros do mercado, Sociedades de Valores e Bolsa, Axencias de Valores e Bolsa ou entidades de crédito. Estes intermediarios, especializados no investimento bolsista, son os únicos que poden comprar e vender directamente en Bolsa.

Outras entidades financeiras teñen capacidade para administrar valores, xestionar carteiras ou tramitar ordes cara aos membros do mercado, pero non para intermediar directamente no mercado. Os Bancos e Caixas de Aforro son as entidades que, dada a súa ampla rede de oficinas, están en contacto directo cun maior número de investidores. Tamén outros intermediarios como as Sociedades Xestoras de Carteiras e os Corredores de Comercio, poden recibir ordes de clientes e transmitilas aos membros de mercado para a súa execución.

O primeiro paso que debe dar un investidor é entrar en contacto con algún destes intermediarios e abrir unha conta de valores. A través desta conta administrarase a carteira de valores do investidor (compravendas, subscricións, dividendos, asistencia a Xuntas, etc.). Asociados a esta conta produciranse os necesarios movementos de efectivos que acompañan as operacións de mercado.

Unha vez aberta a conta de valores e provisionado o efectivo suficiente, o cliente poderá emitir as ordes de compra e venda pertinentes.

É posíbel cursar ordes de valores de forma presencial ou in situ, telefonicamente, por fax ou internet. Aínda que existen certas especificidades segundo o medio empregado, as normas de conduta que deben ser aplicadas polas entidades son as mesmas en todos os casos, especialmente con relación aos contidos mínimos, información previa, tramitación ou execución da orde, etc.

Estas ordes poden canalizarse a partir da sinatura do contrato entre o cliente e a súa entidade financeira podendo ter lugar das seguintes maneiras:

• Presencial ou in situ:
  Na sucursal da entidade da que se é cliente pódese dar unha orde por escrito, cumprindo e asinando o impreso segundo os termos que se consideren oportunos.
  
  A posibilidade de dar unha orde verbal non é recomendábel para o investidor particular e, en xeral, está destinada aos investidores profesionais, entre outras razóns porque a comunicación da execución serve como confirmación da orde.
  
  Unha vez dada a orde, os seus efectos considéranse firmes, enviándose ao membro de Mercado para a súa contratación se a entidade non o é. Polo tanto, en salvagarda dos seus intereses débese dar a orde escrita.
• Vía telefónica:
  Neste caso hai que diferenciar as ordes introducidas de xeito sistematizado a través dun servizo contratado polo cliente, mediante a subscrición dun contrato específico do tipo banca telefónica, etc., das que ocasionalmente puidesen ser dadas por vía telefónica non escrita directamente á entidade.
  No primeiro caso, o cliente debe acreditarse previamente conforme ao procedemento estabelecido pola entidade (clave ou contrasinal). A orde queda rexistrada nunha cinta de gravación que a entidade conserva durante un período mínimo de 3 meses, ampliábeis se o ordenante manifestou desconformidade nese prazo co resultado das operacións realizadas.
  No segundo caso, tamén a orde debe ser rexistrada en cinta de gravación, e ademais é precisa a súa posterior confirmación escrita, podendo mesmo condicionarse a tramitación e execución do mandato por parte da entidade ao cumprimento deste requisito. Tamén se entende tacitamente confirmada unha orde deste tipo cando o seu receptor comunique ao ordenante a execución e liquidación da operación e este non manifeste a súa desconformidade no prazo indicado pola entidade e que, en ningún caso, poderá ser inferior a 15 días dende a recepción da devandita información.
• Fax:
  É posíbel usar este medio só se a entidade o acepta como válido no marco da relación contractual estabelecida entre as partes. As ordes dadas por fax, deben ser incorporadas ao arquivo de xustificantes de ordes co mesmo tratamento que as ordes escritas.
• Internet:
  A difusión xeneralizada de servizos en liña por parte das entidades intermediarias ofrece vantaxes de accesibilidade, rapidez, etc. e nalgúns casos de comisións. Para ofrecer este servizo, os intermediarios deben dispoñer de medios axeitados e capacidade técnica suficiente para garantir a seguridade e confidencialidade das transaccións, e asinar un contrato que conteña de xeito específico nas súas cláusulas as condicións que deben rexer a prestación dese servizo.   

Unha vez formalizada a orde desencadéase un rápido proceso de execución e confirmación. Os sistemas de encamiñamento de ordes instaladas polas Sociedades e Axencias de Valores e a maioría dos intermediarios financeiros restantes farán chegar os datos da orde ao operador do mercado continuo en cuestión de segundos. Á súa vez, este validará os datos e introducirá a orde no SIBE, onde se cruzará con outra orde de signo contrario en décimas de segundo desencadeando o fluxo investidor de información a través do cal o investidor verá confirmada a súa operación.

Inmediatamente despois da execución das operacións, o intermediario preparará os datos necesarios para a liquidación da operación, o proceso de intercambio de valores e efectivo que segue a toda operación de mercado.

Todos os datos de contratación, xunto coas instrucións de liquidación oportunas son trasladados dende a Bolsa a IBERCLEAR, entidade que se ocupa do rexistro de valores e liquidación operacións bolsistas. Esta entidade encargarase de comprobar con todos os participantes no sistema de liquidación (Sociedades e Axencias de Valores, Bancos e Caixas de Aforro) a conformidade dos datos de liquidación. A continuación asentará os valores na entidade designada polo cliente e emitirá as instrucións para que se carguen ou aboen os efectivos correspondentes nas contas que as entidades teñen abertas para tal efecto no Banco de España.