Repsol YPF

Emisións ao aire

A contaminación atmosférica pode deberse tanto a fontes naturais como antropoxénicas, tal é o caso da actividade industrial. Consciente diso Repsol YPF desenvolveu programas de seguimento para o control e a redución das emisións ao aire asociadas ás operacións da compañía, así como actuacións de mellora de eficiencia enerxética. Os principais contaminantes á atmosfera, ademais dos gases de efecto invernadoiro, son SO2, NOx, CO, partículas e compostos orgánicos volátiles non metánicos (COVNM) que proceden principalmente das instalacións de combustión, de correntes venteadas e de tanques de almacenamento. O SO2 procede maioritariamente do xofre contido nos combustíbeis empregados como achega enerxética nos procesos industriais. A súa presenza na atmosfera é responsábel de episodios de chuvia ácida. Para minimizar as emisións Repsol YPF leva a cabo as seguintes medidas:

• Utilización de combustíbeis máis limpos.
• Redución da concentración de xofre nos combustíbeis mediante a posta en marcha de novas unidades de recuperación de xofre e mellorando a eficacia das existentes.
• Desulfuración dos gases de combustión, a través da máis avanzada tecnoloxía        

O NOx prodúcese durante a combustión debido maioritariamente ao nitróxeno presente na atmosfera. O 50% das emisións procedentes das operacións da compañía son debidas aos motores.

Este contaminante é responsábel tamén da chuvia ácida e precursor do ozono troposférico. Repsol YPF reduce estas emisións mediante:

• Control das condicións de operación.
• Selección de equipos de última xeración.
• Substitución de motores de combustión por equipos eléctricos.        

Os compostos orgánicos volátiles non metánicos (COVNM) interveñen de forma indirecta nos procesos de formación de chuvia ácida e de smog fotoquímico. Estes compostos emítense principalmente durante as operacións de extracción de cru e gas, en terminais de almacenamento, en estacións de servizo durante o manexo de gasolinas, e en xeral debido a emisións fuxitivas procedentes de perdas en compoñentes (xuntas, selos, válvulas, bridas...).

As actuacións están orientadas a reducir as emisións nestes focos:

• Recuperacións de vapor de COVNM en estacións de servizo durante a carga dos tanques de almacenamento
• Actuacións de control a través de campañas de identificación, medida e redución de emisións fuxitivas.
• Substitución por compoñentes máis estancos
• Renovación do parque de almacenamento        

Entre outras ferramentas, disponse dunha Norma Corporativa a nivel mundial, cuxa finalidade é a xestión axeitada das emisións atmosféricas. 

Enlaces de interese:

Os nosos datos / Casos de estudo / Indicadores GRI 

Volver